seyîdî dîn xas
qureme dizraw
From the Book:
Dîwanî Melay Cebarî
By:
Melay Cebarî (1806-1876)
2 minutes
958 views
seyîdî dîn xas ...
mîrzay pak mezeb seyîdî dîn xas
perwerdey weçax bargey seyd hewas
kulîn ḧerem daye řêzwar nas
dey sa bo we ’eşq xukan pay daẍ
buz qidîm sał ce nasaz yataẍ
beşq xeznekey xelîfe bapîr
cay zyaretgay ber simîl negîr
beşq muqesem şerwal şîrdax
cem cem yaran pif pif çirax
beşq tul sewz perwerdey dawid
êsta neşkistey řay baweł bawid
her kesê yarê mekêşo pey wêş
bacetî ew şew qewm û kar û xwêş
heta karxaney şefeq mebo şeq
zeraqî şanen bê perwa ce ḧeq
nameyek kyanay şîrîn nameyek
merqûm we teḧrîr şîrîn xameyek
fermawît gwaya ’elî kuřey min
qurmeş berden ce zêd û zamin
çenî îmaman qubey nûr gumet
kyana wît şifî’ perê quremet
qesem we nûze nûzey parkule
beste bom ḧezret ga ḧul ne hule
tûl sewz negiř ahir nyabam
xencer ne kelley xan eḧmed dabam
daye řêzwar xerap kerde bom
dukan dawid piř aw kerde bom
kerde bom nimaz, girde bom řoze
pey ’ezmî wizû sendebom goze
řû řeş bam we toz řay medînewe
şayem berdebo we kulînewe
kelîmey tewḧîd be dił waçabam
ber simêł wêm temam qaçabam
xełkan bwînam ne pay mîmberda
bikêşam perdey xicłet we serda
emanem yek yek amabo weser
quremet namawî bîm û wey ber
madam birdebêt nam ga ḧul çem sye
îtir biqyey îmaman pey çîye?