le kwêy ey şadmanî ey hîway berzî jyanî dił
From the Book:
Dîwanî Bextiyar Zêwer
By:
Fayq Zewar (1908-1952)
2 minutes
687 views
le kwêy ey şadmanî ey hîway berzî jyanî dił
le kwêy ey taqe estêrey beyanî kameranî dił
le baxêka heta çaw biř eka guł çetrî hełdabê
le nawendî guła çend dilberî piř ’îşwe westabê
be bezim û řezmewe zor kes lewêda mest û şeyda bê
ke eřwanim diłim her peste neş’ey tya peya nabê
le kwêy ey şadmanî ey hîway berzî jyanî min
le kwêy ey taqe estêrey beyanî kameranî min
gelê car wa ekewme gêjewe xom řê be xom nabem
ełêm ba meynetî dinya be camê mey le dił labem
le katêka ke wa sermestî noşî ew meyî nabem
keçî derdî diłim zyatir ebê bo kwêwe hana bem
le kwêy ey şadmanî ey hîway berzî jyanî dił
le kwêy ey taqe estêrey beyanî kameranî dił
lelay min wa buwe ta êste waşî tê egem carê
le sîmay diłberan ba çeşnî mang bê şadî nabarê
be pareş nayete berhem le dił derkirdinî xarê
bełam ger bextyar bît şadmanît dête aqarê
le kwêy ey bextyarî toy deway derdî jyanî min
le kwêy ey taqe estêrey beyanî kameranî min
lelay min bextyarî çuwete naw pirşingî azadî
le hercê derkewê namênê bedbextî û bêdadî
ewî biçnêtewe pirşingî azadî, biře şadî
le des pestî zeman û zorî bêgane nîye dadî
le kwêy ey řojî azadî etoy nûrî wiłatî min
le kwêy çawit hełêne bo jyan û bo ḧeyatî min
le kwêy wa çaweřwanim řû le xakî nîştimanim key
be tîşkî bextyarît çarey zamî nîhanim key
le qûłkey pestîya řam kêşe derbestî jyanim key
hîway dwařoj û hestî piř le kelle û naxî gyanim key
le kwêy ey ’îlim û ’îrfan çunke hertoy nûr û hatî min
desa çawit hełêne bo jyan û bo necatî min