gerdûn çît nekird be kurdî hejar
bo ’îzet û qudsî û xêrułła û xoşnaw witrawe
From the Book:
Dîwanî Exol
By:
Akhol (1911-1988)
2 minutes
576 views
gerdûn çît nekird be kurdî hejar?
çî mabê neykey keçřew û řeftar
kam şax û kam deşt kam lûtke û seryał
gułgunit nekird be xwênî kurd ał
kam pê ma, zincîr dayneřzênê
kam dił ma, cexar dayneweşênê
kam bendîxanet piř lawan nekird...?
dîl û řenceřo û perêşan nekird
kam qaremanî wek şêr û çalak
azadîxwahit nexsite jêr xak
kam xanedanit hêştewe bêbeş
le şîn û hawar řoro û bextî řeş
kam çaw ma firmêsk neykirdibê lêł
kê ma nebûbê derbeder û wêł
kam řołe û kîj û jinî bêçare
netkird bê bawan netkird aware
înca be şînî çwar řołe cwanlaw
’îzet û qudsî û xêrułła û xoşnaw
xwênî wişk bût pê geşanewe
xemî dujminit pî řewanewe
bira bo mirdin neken diłteng bin
bo lomey besan řay nam û neng bin
qet wa mezanin nawtan win buwe
ba leştan bimrê, gyantan zînduwe
gořtan be birjang hełkendirawe
kifin: be pelkî kîjan dirwawe
laşetan şora be eşkî cwanan
eşkî qetîsmaw le pêłûy çawan
le kangay diła lawanî weten
gořîçe û gořî êweyan hełken
îklîltan ke wa guł guł çinrawe
le firmêskî ał cergî sûtawe
bełam her ekirê bo tołey ḧeqtan
le laşey dujmin taqî zefertan
qesem be gyanî êwey newcewan
laşey nêjrawtan le girdî seywan
hergîz kołnadeyn bo řojî şadî
heta hełnekeyn ałay azadî
ewsa bang ekeyn piř bem dinyaye
piř bem şaxane û çoł û çyaye
«ay çen berzîye leřêy mîlleta»
«pê le zincîr û gerdin le peta»