her dêmewe

hawřêkanim...
ke dêmewe, serim weku şaxî zozan..
befrî zorî lê dekewê û, xorî ’aşiq xerîkî qij dahênane
ke dêmewe... diłim sengerî cutyare û
şeney coxîn, sewłî keştîy xwênî gyane
şeney xerman le naw derunî piřjane
hawřêkanim... ke hatmewe..
binarî çaw, berberoçkey zistanêke û..
hêşta befrî le serbane.
*
hawřêkanim, ke dêmewe
wek (minarey çolî)berz qît debmewe
ke hatmewe
şeqamî şar degwêzmewe
le dukanî suxorekan, laşe be herzan defroşim
qetranî xwên, weku bazin... be diłdarî nwê defroşim
hawřêkanim... ke hatmewe
wek minare , dêrînekan qît debmewe
le mîkirofonî (pênc ferze)..
debme (nwêju), surey soşyalîst dexwênim
le řêzî mam sofîyekana... (kulêrey yeksanîm tyaye)
le hemû çokdadanêka... hełsanewem legełdaye.
*
ke hatmewe... debme beharî kelawey
qełatî carî caran û... xor bo kołanekan, dênîn
herçî minałî geřeke, gurz gurzanê deken û
qerzî kirêkaranî şar, le xanwe berzekanî hewlêr desênîn
*
ke dêmewe... wek minarey çołî berz, qît debmewe
ke dêmewe... gyanim topełê agire û
be çekuşî çewsawekan, dadegîrsê
sozim lafawî rubare û
le řamałênî zelkawî, kes natirsê