pařanewey xan miḧemed û noş aferîn le dergay xway gewre
From the Book:
Suɫtan Îbrahîm û Noşaferîn
By:
Khana Qubadi (1704-1778)
7 minutes
342 views
pey řica û lałe temamîy yaran
lałan bedergay padşay subḧan
watin ya kerîm xalêq dana
sułtan îbrahîm beyo be’ey ca
bew tenteney wêş dêw swarewe
bew tac teła bew tomarewe
şêr piř huner têkderî sipa
nazaran neban zelîl ney ca
wat ḧemîd eto çenî nazaran
bişo be ew ko qerar bigîran
her ew şew ḧemîd nazaran berdiş
nekoy ẍar sext ca be ca kerdiş
mah zeř’efşan hem noş aferîn
çenî kenîzan nîştin be ẍemgîn
xan miḧemed watiş ey tîr’endazan
bibon pasban şekerîn řazan
çendê seng û xak derdem ko kerdin
hicûm pey ey ko nazaran berdin
wat ḧemîd melaḧ herta gyan darî
ceng serumał esîran kerî
ta min řû kerûm ne sipay xûnxiwar
eger xudawend wenem bibo yar
ya aro sipa mawerûm nebêx
ya serim meken be ełmas têx
her weqit kujyam nemeydan kar
ser nyam neřay şazadey salar
her weqit şazade ama we ey ca
qesemit medom bezat ełła
bwaçe xan miḧemed dîdeş nerat bê
întîzar begerd, xaşak pat bê
êd wat horêza be diłey biryan
hîmet xwahî kerd ew nerûy giryan
nazaran watin xudat bo hamřa
toman da be dest yektay bê hemta
ce kohat bewar řû kerd ne sipa
watiş ey mes’ûd şûm řûsya
beyon be meydan yekayek tenya
ta serş neqelb bikerûm cya
watiş îbrahîm fêrarş kerden
îse to aman ecel awerden
şay noş aferîn mah zeř’efşan
to bider we min wêt bwer řewan
to xel’et xas ez min bistane
řû beragey çîn pey wêt binmane
berşî ce ḧerfim betêẍ abdar
ce kasey serit bermarû demar
xan miḧemed watiş mel’ûn murdar
umêdim besten bedanay cebar
taroḧim menden hem gyan şîrîn
ser menyom neřay şay noş aferîn
ha wexten beyo şazadey salar
sipay perî û dêw «mawer» bey dyar
eto be wêney elyas padşa
mekêşût bedam şûm řûsya
mes’ûd êd şineft kêşa tîẍ têz
watiş xan miḧemed nîyen cay gurêz
bew tewr da ne ferq xan miḧemed beqar
tîẍ nerûy tîẍ mel’ûn murdar
xan miḧemed şimşêr kêşa newer da
mes’ûd ke qełẍan kêşa we serda
bewtewr da ne ferq qubegay esper
daş ne bahoy řast mes’ûd bedgewher
nobey mes’ûd bî dest da qedare
daş ne ferq ser xan bêçare
çwar enguşt ne ferq xan miḧemed pey kerd
welḧasił ta taq ebroş cya kerd
mes’ûd wat sipay xan bî nêgûnsar
bişin nazaran bawerîn bewar
hêrş dan sipa derdem beyek bar
lwan nazaran baweran bexwar
xan miḧemed çun şêr tekan da newca
serş muḧkem best řû kerd nespa
yawa we sipa xiroşa be qar
gurêzan temam swaran hezar
lwa pey mes’ûd zerbê da weneş
bew destûr sipa hicûm awerdiş
axir ke mes’ûd řewan bî pey ko
sipay tîr’endaz tîrşanan bê şo
ẍułaman derdem tîr wistin bewar
tîr wistin ne řûy mel’ûn murdar
mah zeř’efşan şay noş aferîn
dîdeşan piř bî ne seyl esrîn
çenî kenîzan kerdin munacat
lałan ne dergay qazîwilḧacat
ya řeb beḧacet berwî ’eşqibazan
bedaẍ sîney cangudazan
beyareb yareb şeb zîndedaran
be umêd dił umêdewaran
hêma ke du’a temam newa na
qadir qudret, qudret nimana
nîga kerdişan hem nerûy asman
ferheng dêw çenî şazade aman
şazade nedûr nîgay zemîn kerd
xan miḧemed zamdar be nezer awerd
mes’ûd řû kerden nerûy quley ko
şay noş aferîn ha nezarî û řo
şazade êd dî taqet pêş nema
ẍuřa be heybet řû kerd nespa
bewtewr ne’re da nerûy qaruqîn
kûh û derudeşt lerza ta zemîn
şazade bewtewr kêşa tîẍ tîz
wistiş ne sipa şûr řestaxîz
esp û merd û zîn mewstiş be xak
«elḧezer» xêza negroy eflak
şazade mes’ûd nîga kerd nedûr
dîş ke şazade meyo bezerûr
be na’îlacî ama be meydan
watiş şazade bê namunîşan
sipay meẍrîbî gurêzan newca
xałî kerdişan řûy ’ersey sipa
weqtî ke mes’ûd řû kerd ne ewca
watiş şazade şûm bê ḧeya
* merşar demişq neyadit şîyen
nezanay meẍrîb bî saḧêb nîyen
mebo ḧeq wêm be wêm bistanûm
řoḧit be dozex seqer bikyanûm
şazade bew tewr xeşimş eser kerd
ne cebhey cewşen mûş ser ber’awerd
dest da be şimşêr daş ne ferq ser
mes’ûd ke lwa ew nezîr esper
weqtê daş neser esper şeq awerd
şimşêr neferqiş ta naf wiyerd
wextê mes’ûd kefit nexak sya
berz bî ne sipa bang waweyla
sipa xiroşa perê şazade
şay noş aferîn wêş kerd amade
mah zeř’efşan hem ama be xwar
řûkerdin ne fewc hezaran hezar
her sêşan bew tewr ḧemle awerdin
sipay meẍrîb şar tarumar kerdin
xan miḧemed awaz şazade şineft
çun şêr şikar feryad kerd qwet
ferheng dêw bewtewr dar şimşad şana
we herkes meda erwaḧ mestana
şazade ferma be ferheng dîw
wizo ne meydan welwele û ẍerîw
sipay meẍrîb şar fêrarî kerdin
bedest ferheng gyan der newerdin
mabaqîy sipa ke aman bewar
wêşan wist nexak şazadey salar
şazadey serwer guzeştê kerdiş
ferma be ferheng des kota kerdiş
cew dem xan miḧemed ḧazir bî newca
sucde kerd lwa dest şa bosa
şazade xan miḧemed girtiş ne aẍoş
wêney deste guł bo nya ne boş
watiş aferîn ey şêr serwer
xel’et dapeneş nîm tac ne zeř
şay noş aferîn watiş ke’ey şa
xeber xurşîd pêman der neca
şazade eḧwał temam beyan kerd
şay noş aferîn kêşa ah serd
ew şew řefîqan řazan mekerdin
ser nexaw şîrîn řaḧet neberdin
ta sub řewşen bî sułtan bexuřem
ferma ke se’îd ḧazir ken der dem
şazade se’îd ke ḧazir kerdin
derdem we pay text şazade berdin
watiş ey se’îd eto çêş kerdî
ey fîtne û fesad to berpa kerdî
min şeř ’elqem zelẍem dêw kerdim
qesir suleyman bedest awerdem
telîsim zengułe şûm napesend
arayşim kuşt zeřcam dêw bend
xatûne xanim min xelas kerdim
şay noş aferîn bedest awerdim
min şîm bemaway cezîrey waq waq
zengîy ademxiwar yekser kerdim pak
min şar fereng bedest awerdim
xurşîd ’ałem min xelas kerdim
besed meraret weçend derdî ser
şay noş aferîn awerdim we ber
to tema’it bî we bî derdîser
şay noş aferîn bawerî we ber
«ew buwe ḧerem we bê derdîser
min wêney mecnûn deşt gîrûm newer»
şazade se’îd ser wistiş bewar
ce xecałetî nama be guftar
wat ey şazade ce řay serwerî
minîş çun ẍułam azadim kerî
şazade derdem řeḧimş eser kerd
şazade se’îd azadiş bikerd
espişan awerd be zîn zeřkar
daşan be se’îd derdem bî swar
* şazade se’îd hîmet xwahî kerd
lwabe řawe řû be meẍrîb şaberd kerdin
cedmay çend řoj ferma koç kerdin
řû be řagey şar meẍrêb şar kerdin
besed ’îzu naz daxił bîn we şar
sakîn bîn cetoy qesir zeřîn kar
ta çend řo newca mêhmanî kerdin
şazade cewdem ’ezim koç kerdin