sułtan îbrahîm se’îd dekate paşa û berew demişq weřê dekewê
From the Book:
Suɫtan Îbrahîm û Noşaferîn
By:
Khana Qubadi (1704-1778)
5 minutes
356 views
ferma be ferheng ḧałî bo celat
ehil meẍrêb şar çenî meḧałat
bwaçe se’îd bî we padşa
îta’et biken wezîr û sipa
«her kes tecawiz ne ferman şa
serş ne ḧełqey beden kem cuda»
sułtan îbrahîm lwa be řawe
be fetiḧ û nusret be diłřubawe
be’eyş û diłxiwa hem bekam ’eşq
ta yawan be ḧed mekan demişq
şazadey dilêr şêr ’ersega
ferma we paken xeyme û barega
xeymey dane bend we pakerdişan
teşrîf be derûn xeyme berdişan
ferma xan miḧemed řefîq řazim
meḧrem ’ezîz řaz û nyazim
name înşa keyn be cehangîr şa
lazmen cey weqit şa bikeyn aga
dest berd qełemdan zeřîn ber’awerd
êradey teḧrîr şîrîn name kerd
eweł îbtîda benam xuda
duwem be îqbal feř padşa
farîẍ bîm ceşeř řagey piř xeter
ne cefay dêwan sizay canewer
elḧemdulîlla be murad dił
îradey meqsûd temam bî ḧasił
ceme’rekey ceng řostemî załî
ne řay lutif ḧeq saḧêb îqbałî
sikender şêwe şay dara şiko
bider mizganî mujde bo be to
ce yumin îqbał şay dara nîşan
awerdim bedest mah zeř’efşan
kax suleyman ew syaẍułe
hem berbad kerdim dêw zengułe
cay ademî xwar cehem kerdim pak
caneweranim yekser kerd helak
cezîrey waq waq zengîy adem xwar
meẍrêb şarim girt ta xeta dyar
xatûne xanim hem ber’awerdim
şarî ferengîş teseruf kerdim
çend wadîy piř bîm, xeter tey kerdim
binçîney dêwan cebêx awerdim
bezor bazû dêwim da şikest
awerdim bedest şox dîdemest
berû sifîdî be meqsûd kam
elḧemdulîlla be murad yawam
tey kerdim wadî derya û kûh û herd
ta qedem bexak mułk tom awerd
wacêb bî be wêm hem yad’awer kem
cey mujdey şîrîn şa baxeber kem
xan miḧemed sîfarş serdar e’zem
yekser kerd řeqem bê zyad û kem
yekê tełeb kerd xeylê ferzane
nameş dabedest kerdiş řewane
řû kerd ne demişq be te’cîl û taw
ne beřoj aram ne şew kerdiş xaw
qasêd piřfam yawa çend menził
şî be derwazey şah hezar guł
pyade bî ce esp kerdişan řahî
ta şî be ḧuzûr baregay şahî
ce ḧuzûr şa sucdey zemîn berd
ber’awerd name ta be şa siperd
name da be dest padşay dana
mutalê’eş kerd seraser wana
ce mujdey ferzend şikawa çun guł
derdem sakîn bî êş û sizay dił
mujde da be cem’ ehil serdaran
wezîr û nayb hem xidmetkaran
xeberdan perê sewł qemernaz
walîdey diłsoz şay şekerîn řaz
kerdiş şukiraney danay keremdar
şêwey pejmurdeş bî we new behar
ẍewẍa kefit neşar xelayq coşa
ehil şar yekser temam xiroşa
aman beqapîy şay saḧêb temkîn
gişt kerdin senay cehan aferîn
cewdima daşan hem beneqare
mejendin meqam neher kenare
* ferman da derdem şay bułend exter
çil hezar nefer swar bî yekser
de hezar ẍułam sadey duř negoş
gişt kemer teła zîbay gewherpoş
qumaş fereng dîbay xoş teraz
sed hezar elwan perê pabendaz
gişt zîba qamet teşt zeř bedest
pey zeř’efşanîy şazadey sermest
sewaran lwan besed ’îz û naz
temam ehil şar be ’ezim pêşwaz
«geberger» çenî kûs û neqare
mejendin pey pey we hezar bare
řûy seḧra poşan xelayq yekser
temam deştuder girte bên newer
şa muntezêr bê key byawo pêş
bo binyo we boy hem ferzend wêş
naga peyda bî lifkey beydaxan
seḧra û deştuder bî we çiraẍan
şay řewşen zemîr dîde gird kerd
şazadey çînî be nezer awerd
xan miḧemed çenî ḧemîd melaḧ
ce dewr şazade temam piř selaḧ
ce berqey serney hem zirê û cewşen
serzemîn temam gişt bî we řewşen
xan miḧemed wezîr ha cedest řas
celay dest çep ḧemîd bedłiwaz
şatran cełd penc hezar nefer
temam ce řêkab şazadey serwer
sedu dû hezar swar cewşen poş
penc hezar swar sadey etłes poş
meyon berawe sipa pes û pêş
girten dewradewr şêr bê endêş
herta nezdîk bîn sipahan behem
şah cehangîr pyade bî derdem
cew teref ama şazadey guzîn
çenî xan miḧemed pyade bîn ce zîn
şazade derdem sucdî şa berdiş
adab erkan be ca awerdiş
ama be guftar şah tebarek
watiş ey ferzend sefer mubarek
be xeyr ke amay neray xeternak
elḧemdulîlla ey şêr bê bak
dest kerd negerden şazadey guzîn
watiş ey ferzend hezar aferîn
hem kerd merḧebay ḧemîd namdar
çenî xan miḧemed her dû wefadar
tewazu’ zyad şa kerdiş new dem
derlad swar bîn her çwar we hem
şazade řû kerd wat be wezîran
tesdî’ tan kêşan dana û emîran
ewend teła û zeř kerdin zeř’efşan
cewahêr bê ḧed dan be feqîran
ta ke daxił bîn ne řûy barega
wezîr û nayb hem çenî sipa