řawêjkirdinî wezîran û name nûsîn bo kyanûş û hatnî bo şeřî xurşîd
From the Book:
Suɫtan Îbrahîm û Noşaferîn
By:
Khana Qubadi (1704-1778)
8 minutes
601 views
xanaPen name ey dunya çerx neyrengen
ga mayl be noş gahê be cengen
be ḧerf řawî suxengoy werîn
bişîn beserkar xurşîd şîrîn
wextê gêławe hîmet xwahî kerd
teşrîf be gułzar ḧeremsera berd
şî be toy xełwet perdenşîn bî
perê şazade mat û ẍemgîn bî
ne şewq şadî ne meyl bade
ḧeram kerd nedaẍ dûrîy şazade
* nefîkir efser tac şahî daşt
daney meyl dost nederûn kaşt
ehil welayet me’lûm bî lêşan
keftin ne xeyał kar sazîy wêşan
tedbîr kerdişan bezewq û mezaq
nîştin necaye gişt be îtîfaq
mewatin behem neřûy syahî
saziş nimebo ’aşiq û şahî
xurşîd nehîcran xełwet nişînen
’aşiq bedîdar noş aferînen
misułman byen peymanş besten
muhir qułf dîn ferheng şekesten
cewahêr û zeř herçê mewînî
gişt kerd besewqat şazadey çînî
ẍułam û kenîz meta da pêşan
peymanê bestin nebeyn wêşan
sa her êd xasen yaran bê hoş
name bikyanîn belay kyanoş
* ha ne uştirxan hem ’emûy wêşen
er beyo layeq ḧikûmet pêşen
kar xurşîd şa î’lam kerîn pêş
horêzo beyo pey mîrat wêş
ba be cay xurşîd ew padşa bo
saḧêb tac û text zeřîn kuła bo
namey bey destûr seranser be noş
nwîsan belay şah kyanoş
daşan be qasêd derdem bî řewan
mudar nekerd şî be uştirxan
nameş ber’awerd qasêd dana
daş be kyanoş seranser wana
mezmûn nameş ḧałî bî ne’an
kefit ne tedarek xeyme û sipa û san
bewe’dey sê řoz temam ehil şar
kerdiş muheya sî hezar swar
gişt swar nepişt taze semendan
esłeḧey cewşen hem hunermendan
ber’ama ne şar nekerdiş direng
řû nya nemułk naḧyey fereng
sipay kyanoş nezdîk bî neşar
name kyana pey kûçey bazar
xeberdar kerdiş ehil şar yekser
ama kyanuş be sipa û leşker
xedeme û kenîz zanaşan bey kar
xurşîd ’ałem kerdin xewerdar
xurşîd çun şineft ey kelam û řaz
piř bîn ne esrîn nergisan naz
watiş ey yaran çêşen min çare
kî medo saman çarey ey kare
cageş xałîyen şazadey xoş xo
şêr şêrangîr ejdehay şiko
be zułim derûn besîney řêşim
min nimezanûm kam derd mekêşim
celay cemał da zułf kerd webeydaẍ
tac nya ne ser şay şîrîn demaẍ
ama we bîrûn be fîrozeyî bext
wêney keyanan nîşt we ban text
ferma wezîr û e’yan awerdiş
nekar ’emûş mesłeḧet kerdiş
perî çêş aman çêşen mude’aş
ełbet celay wêş waten padşaş
wezîr û e’yan aman be guftar
watin ey xurşîd şox şîrîn kar
to ’aşiq be yar musłimananî
çenî ew ne şerit hem ne peymanî
xasey ẍułaman cewahêr û genc
nazk kinaçan daney giran senc
espanî tazî, naqe enasan
qetarey qatir yek yek şinasan
’elawe ke gyan wêt nyay nerêş
ey genc û esbab temam bexşay pêş
* cewdima hem wêt xełwet nişîn kerd
pat we ban text şahîy wêt neberd
* îse duşmenan çwar dewrit tenden
řay amoşo û řêy derit benden
îse meşweret mekerî pêman
řa nimeberîn beyaney wêman
me’lûm bo celay şay şîrîn çare
wêtanin mayey fitney ey kare
tełeb kerd wezîr xezênedarş
danay piř kemał fermanberdarş
qufił xezane mexfî kerdin baz
merdan namî kerdişan awaz
her kes be mêqdar wezin mayey wêş
ce le’il û gewher ce zeř bexşa pêş
bewe’dey sê řoj şay şîrîn řuxsar
deh û dû hezar swar kerd teyar
ew şew besîney hezar derdewe
befîkir û xeyał şew řo kerdewe
seḧer ke xurşîd da ce minaran
şîrîn tertîb kerd çabik swaran
deh û dû hezar swar cengî
ce xanezadan esił ferengî
gişt be kemerbend esłeḧey neberd
ce ḧerbey cengî kul muheya kerd
xeyme û barega ceşar kerdin bar
be xatir melûl ber’aman ce şar
yawa be cayê xeyme û barega
wextê barega kerdişan we pa
naga kyanoş ama bedîdar
leşkir û sipaş sî hezar swar
bał beydaxan sipay kyanoş
řûy hamûn poşa negoş ta be goş
ama benezdîk sipay kîne xwa
xeyme û barega kerdişan berpa
ew şew be aram nîştin mey noşan
seḧer bezim ceng çwar ayn poşan
kyanoş ferma ji endin tepił ceng
beydaxan kêşan řûbeřûy fereng
neherdû canîb sipa bestin sef
wêney hîwnan lêwan piř nekef
sipay herdû sef muqabêl behem
şêran pey ẍezeb ebrû kerdin xem
* ne’rete pêka kyanoş «.........Missing» gurd
řû kerd ne sipa dest be şimşêr berd
watiş ey xurşîd nimebî fayq
padşahî û text be to çi layq
’aşiqî bişo ne pey kar wêt
ḧikûmetdarî sûd nedaro pêt
to ne toy derûn cergit pełasen
sułtan îbrahîm perê to xasen
to bê deng bişo pey me’şûqey wêt
kes pey de’wa nimeyo neřêt
xurşîd ey řaze şineftiş begoş
dest berd be şimşîr şî pey kyanoş
wat ḧeram zade ferîbit werden
we’ebes ey fîkir napuxtet kerden
be taq ebrûy sułtan îbrahîm
şerit bo gyan to bikerûm teslîm
êdwat û sipa daxił bîn we hem
erz û semawat yekser bî matem
daşan be hemda ḧerbey kîn beqest
řêza ne meydan ser û pa û dest
ewro ta xurşîd şî neperdey řeng
kyanoş çenî naz tersay fereng
ta nezdîk şam kerdişan neberd
we’dey êwar bî řû wepes awerd
kyanoş beşewq xatir guşadî
ferma ji endişan tepił azadî
ew şew farêẍ bîn ta sifîde dem
seḧer horêzan kêşaşan ’elem
ce her dû teref dan netepił kûs
hewa tarîk bî zemîn ab nûs
řû nya pey ceng sipay şûruşeř
cegřey espan dû goş mebî keř
xêzya seday şeqey teberzîn
ce ḧerbey neberd dilêran kîn
neher dû canêb xêzan el’eman
taw hey neberd kefit neřûy daman
ewend ser keften nemeydan kîn
sipay kyanuş zor awerde bîn
bew tewr ke sipa hicûm awirdiş
sipay xurşîd şa tarumar kerdiş
tenha xurşîd mend neřûy karzar
ewhem bekemend kerdin giriftar
xurşîd cew demda kerdiş munacat
lała be dergay qazîwilḧacat
watiş ya kerîm ferd feryadřes
her to desgîrî pey bê kesan kes
to be lutif wêt bigêre desim
umêdim her toy xo min bê kesim
naga be meylan karsaz karan
yawa be feryad gişt derdedaran
cew teref dastan şazadey salar
be ferheng dêw derdem bî swar
řû kerd ne wełat naḧyey fereng
ta yawa bew cay ke mesaf ceng
şazade wextê nîgay seḧra kerd
xurşîd ’ałem benezer awerd
dîş ke zelîlen be des kyanoş
bew tewr ne’re da ’ałem şî nehoş
kyanoş derdem nîgay bała kerd
şexsê sehminak be nezer awerd
swaren nepişt yek dêwê ’ezîm
leşkir û sipa yekser hat nebîm
şazadey salar ama be zemîn
watiş kyanoş mel’ûn bê dîn
to xurşîd bey tewr zelîl nimanay
ełbet min helak ya murde zanay
ferheng dêw derdem řû kerd nemeydan
esp û merd û fîl mewist be asman
nerûy hewada hem maman bewar
nehewa aman çun terzey behar
nîga kerdişan nerûy karzar
merd nerûy hewa hem meyo be war
leşker êdiş dî kerdişan fêrar
hîç kesê nemend newmawa û dyar
kyanoş derdem xurşîd řeha kerd
ew hem çun yaran řû ce gurêz kerd
şazade çun şîr tekan da newca
watiş kyanoş mel’ûn gumřa
karim hen be to bigêłe wepes
werne be me’bûd ferd feryadřes
karê kerûm pêt neřûy ’ersey kîn
kerût we’îbret neřûy serzemîn
kyanoş şineft ama be duma
dest da be şimşêr girtiş sereřa
şazade tîẍê da cerûy kemer
kerdiş be dû nîm çun xyar teř
leşkir fereng hicûm awerdin
xeymey kyanoş ẍaretiş kerdin
şazade û xurşîd byawan we hem
ew çun perwane û xurşîd wêney şem