maławayî şazade le xurşîdî ’ałemgîr
From the Book:
Suɫtan Îbrahîm û Noşaferîn
By:
Khana Qubadi (1704-1778)
4 minutes
392 views
xanaPen namey xoş nûys baş ḧekakan
te’rîf kunendey dastan be dastan
bişîn beserwext kar şazade
çun beca guzaşt ew zewq û bade
barxane û bend qetar kerdin bar
besa’et se’d ber’aman neşar
şahan swar bîn beweswasewe
bew xwace û kenîz tuḧfey xasewe
bew naqey xoşrew kejawey yaran
bew destey ẍułam şîrîn sewaran
bew seday mutrêb kizey sazewe
kenîz û ẍułam dem beřazewe
îşare benaz mekerdin behem
meřanan benaz esp xoş qedem
xêza boq kûs keřenay şadî
çawşan we bang dewłet zyadî
mah zeř’efşan şay noş aferîn
padan be řêkab swar bîn we zîn
swar bî xurşîd nazdar diłteng
zułf kerd bebeydax şeř aşûb ceng
zîłey bang berz ẍewẍa kefit neşar
xiroşa behem mexloq bazar
seday zîl û bem zeng camaze
řeşmey ser bezeř cyaz taze
semendan beřext tełakarewe
mekêşan xiroş ce bazařewe
huney ziřey řext taze semendan
mesendin dû goş ce danş mendan
ehil şar yekser we hem xiroşan
ne zîr pada çend tufił bê gyan
çil hezar swar temam xanzade
çabik swaran ferengî zade
xatûney perî şay noş aferîn
mah zeř’efşan zułfan ’enberîn
xurşîd hem we berg tełakarewe
bew turmey zeřbaf şedey larewe
bey şox û řendî neşar şîn we ber
heryek ne şîrîn ermen şîrînter
medrewşanewe nerûy xwan zîn
şazade xusrew xurşîd çun şîrîn
xurşîd ne hîcran ser ne sewda û derd
teqala çenî xeyałan mekerd
meşîn berawe suḧbet medaştin
bełê nederûn tuxim ẍem kaştin
ta dû fersexî muşaye’et kerd
cew dima xurşîd hîmet xwahî kerd
xêza ce leşker bang waweyla
bew tewr řefîqan cehem bîn cya
xurşîd ’ałem şay şîrîn çare
gêławe besed dad û pejare
şî be toy ḧerem nîşt neperdey ẍem
ne text şahî yawa be matem
ne daẍ hîcran dûrîy şazade
terk kerd xorak pyałe û bade
* cew teref yaran menził buma bîn
bemekan mułk meẍrîb cûya bîn
şîn be ko û sara girdişan qerar
ta dû fersexîy nezdîk bîn ne şar
xeyme û barega kerdişan berpa
ta asûde bîn gişt nerenc řa
cew dem xatûne xałan lacwerd
ferheng dêw bedest şazade siperd
hîmet xwahî kerd perwaz kerd der dem
ta şî be gułzar gułbaẍçey îrem
şazadey çînî dił piř řaz û ẍem
ama we yadiş xurşîd ’ałem
xan miḧemed dana tełeb kerd we pêş
watiş ey diłsoz yar cefakêş
arezûy dîdar xurşîdim kerden
hîcran dûrîş zorim awerden
mebo min îmşew meyl xaw nekem
ta meşûm belay xurşîd ’ałem
satê bwînûm werter ce mergim
bel efsurde bo zaman cergim
mebo to ney ca tofîq piştit bo
hemîşe agat ce kar wêt bo
xan miḧemed watiş ey şêr xoş xo
’erzim her êden wîr dimat bo
cenew şazade ama be guftar
wat ey xan miḧemed yar wefadar
be’ezim lwan berneşî ney ca
ey xeyme û xergah bidare aga
şazadey melûl bexatir peşêw
dersat swar bî we ferheng dêw
nîşt neřûy hewa dêw xoş aheng
řû kerdiş neşar naḧyey fereng