îzin xwastinî şazade le xurşîdî ’ałemgîr
From the Book:
Suɫtan Îbrahîm û Noşaferîn
By:
Khana Qubadi (1704-1778)
5 minutes
364 views
xana zemane karş dû řengen
ga mayl benoş ga mayl cengen
ne noşiş dewam ne taser cefa
ne cengiş daym neta ser sefa
ga kesê menîw text şahî
wekesê medo şorbey gedahî
şazadey çînî heway weten kerd
walîde û pêder bexatir awerd
horêza we pa bedîdey piř ẍem
teşrîf berd belay xurşîd ’ałem
wat ey nazenîn beyzay şewq min
xak to efser tac ferq min
îstid’am êden beser’efrazî
be lutif û eş’ar bendenewazî
be eltaf wêt şay ḧorî leqa
merexes kerî ey ’ebid derga
dîdeşan neřan walîde û pêder
arezûmendin zam dił xeter
şemîm çînim yawan be demaẍ
cem bîyen nedił dûd û derd û daẍ
weswasey pêder, xeyał mader
ahîrş wisten neyaney ciger
ḧekakan waten pîran kamił
xaşak weten xasteren neguł
ełbet min weten şyam arezûn
xarş celay min wêney muşk bûn
bişûm beweten bwînûm xase
ta nesoço dił besoz tase
wey tewr derûnim piřsoz û derden
arezûy dîdar pêderim kerden
umêdim êden nazar dułber
biderî řuxset ey bendey kemter
warêd bûm bezêd we bê derdîser
bizanûm çonen walîde û pêder
ye xeylê wexten wêney gumřahan
şêwyan lêşan qanûn şahan
ne hîcran min keften we bê gyan
êntizarmen bedîde û begyan
herçend binîşû celay to fêşter
bełê ’umir min mebo zyater
xurşîd ke zana ’ezimş zerûren
sê sałen ne mułk memleket dûren
cewab da besoz wat berguzîdem
xuda hamřat bo ey nûr dîdem
fîday gyanit bam ey şêr serwer
’ezim lwaten xudat bo yawer
bełê merg to şay wała neseb
řoy řewşen ce lam mebo wêney şeb
şazade şineft kelam şîrîn
dîde nemnak kerd piř bî ne esrîn
watiş fîdat bam şox dîde mest
min êxtyarim nemenden we dest
werne ’aşiqan hertake merden
kê bo bê şertî çenî dost kerden
min ye şertim bo şay şîrîn cemîn
wextê ke yawam be çîn û maçîn
ḧeram bo ce min xurd û xaw û noş
be awaz soz sazan nedem goş
şay noş aferîn wenem ḧeram bo
take min nebûm bexak pay to
çunke cey werter min ’ehdim kerden
pey noş aferîn sewgendim werden
xurşîd wat ey řaz kem bwaçe wes
ey ḧerfe cergim kerden weqeqnes
bełê min sergerd řêzey řazit bam
be dîdew beroḧ payendazit bam
ferda tedarek esasey sefer
mesazûm perêt xudat bo yawer
řazî û nařazî şêr diławer
qebûł kerd řazan şîrîn dułber
amawe celay naz tersay fereng
teşrîf berd belay yaran hemřeng
xatûne xanim perîzade řend
mah zeř’efşan şox diłpesend
xan miḧemed çenî ḧemîd çalak
girte bîn aram çun şêr bê bak
sob seḧer xurşîd bêdar bî nexwab
melûl bî çun xem melûlîy silab
be îşarey çem dił nebî řazî
kefit nexeyałat tedarek sazî
ferma wezîran muns hamřeng
ekabirzadan naḧyey fereng
perê karsazî tełeb kerdişan
hezîney sefer gişt awerdişan
hefit hezar ẍułam qeşeng sade
gişt egrîce seyf ferengî zade
penc hezar kenîz, tuḧfey diławêz
bała şox şeng kelam şekerrêz
* de hezar sewar, semend guł guł
kul zîn ziberced daney medaxił
yek yek be kemał wêş kerdiş pesend
pey nazenînan ẍułaman řend
de hezar zîba be qîmet sengî
qumaş xoş řeng řiştey ferengî
dû sed uştur bar dane û cewahîr
barşan gewher çun şołey ahîr
sêsed şutur bar yaqût û mercan
tac merse’î layeq we şahan
heşt sed şutur bar ce nuqił û nebat
çend qebay zeřbaf beresim xełat
dû hezar qatir naqey camaze
zîn zeř’endûd ḧaşye taze
sê hezar qatir, qatir barkeş
serpałan meẍmer perê sermefreş
sê hezar dane sikey xuş řewa
perê lewazim şew şewçiray řa
dirust kerd temam yekser amade
kyast we pêşkeş perê şazade
espan tazî paw dimay sya
kyast perêşan pey xuşnûdî şa
çil espan temam mexrewd xara
kiław ałtûn dozkar buxara
le cam merse’ řîkab zeřîngar
kyastiş peřê şazadey salar
baz hem beteqrîb ’uzir awerdewe
řewyey muḧîbet taze kerdewe
şazade beşewq xatir guşadî
kerdiş ne dułber xane abadî
cew dima yaran gişt be xatircem
şîn belay şîrîn xurşîd ’ałem
’erz kerdin şîrîn şahît payedar
nimek ḧełał ker xudanîgehdar
xurşîd êd şineft dił awerd be teng
řêzna esrîn mirwarî beseng
wat xuday ’ałem pişt û penatan
dest yeduła mededkartan