agadarbûnî yaran le ḧałî şazade û hatnî řux
From the Book:
Suɫtan Îbrahîm û Noşaferîn
By:
Khana Qubadi (1704-1778)
5 minutes
746 views
ey çerx ẍedar şermê nîyen pêt
xecałet nabî to ce kirdey wêt
* key çenî kes be myan bestî
kerdî řefîqî to be dirustî
* to kêt nepêça bedam beławe
kêt nawerd be tay řiştey cefawe
ba berkenar bo ew ce fam sade
bişîn beser wext kar şazade
zehirş nederûn bew tewr kar kerd
řengiş çun xezan ze’feran bî zerd
endam letîf wêney guł tebeq
e’zay pakîzeş temam bî şeq şeq
qetrey zox zerd ce beden serwaz
carîyen ce ten wêney marangaz
mewc cwanaw teř kerden azaş
yawnan we ser wiyerd hem ce paş
çem piř ce esrîn xeyałat mekerd
pey pey mekêşa henasan serd
xan miḧemed ce deng nałîn bê şo
ama ne goşiş deng řo hey řo
cew zarî û şîwen nexaw bî bêdar
dîş ke şazade menało be zar
betaw û te’cîl cełd û amade
şî goş da bedeng nałey şazade
nîga kerd xeylê peşêwen ḧałş
zerd bîyen çun bey şêwey cemałş
ahî serd kêşa şî be tasewe
kefit nederyay beḧir be weswasewe
herçend hawar kerd bezarî û feryad
celay şazade hîç seda nedad
xan miḧemed dî serda we berda
beher dû destiş bida we serda
mewat ey bedbext ye çêş aman pêt
meger nezanay to cekar wêt
xeylê kerdişan şîn bê saman
axir wat ḧemîd destim be daman
yezarî û şîwen sûd nedaro pêş
karî ker be ḧał şazadey diłřêş
ḧemîd êd şineft bedłey piř coş
peř murẍ awerd da be řûy ateş
dersat ḧazir bî murẍ wefadar
nîga kerd be řûy şazadey salar
dîş ke şazade keften we řûy xak
endam pakiş yekser bîyen çak
řux wat xan miḧemed yekar zehren
şazade bey tewr nezdîk wemergen
min bişwem welay ’ebdureḧman şa
bełkim ḧekîmê bawerû û ey ca
sa ke êdiş wat perwaz kerd newca
yawa be xidmet ’ebdureḧman şa
şa watiş aman ey murẍ guzîn
pey çî amanî bedłey ḧezîn
murẍ watiş ey şa derûnim tengen
şazade helak zehir ferengen
sa ke êd şineft ’ebdureḧman şah
hewada ce ser tac û hem kulah
meymûne xatûn şineftin be goş
bida we serda derdem bî bê hoş
hem ama be hoş bangiş nederda
xak řûy zemîn kerdiş we serda
nesrułay ḧekîm ḧazir bî new ca
xatûn wat ḧekîm babşîn we řa
ḧekîm dersa’et horêza we pa
we’dey sê sa’et yawan be ew ca
dîşan şazade ẍełtan xaken
ser ta paş temam yekser çak çaken
xatûne xanim wêş wist ne řûy xak
xeylê lawna şîr derûn çak
ḧekîm wat wesen ey girye û zarî
řûken cedergay kerîm barî
eger nîm nefes mendebo baqî
dewaş mekerûm teḧqîq be taqî
xatûn wat ḧekîm dewaş bikerî
bełkim ’elacê şazade kerî
herçê mewazî ce mał dinya
mederûm penet temam bedłixiwa
ḧekîm wat xanim minet wegyanim
herçê bizanûm we ban çemanim
dest berd ke deway me’cûn ber’awerd
çenî noş darû amête hem kerd
cew dem peyda bî ’ebduřeḧman şa
çenî çend ḧekîm yawan be ew ca
derleḧze ke şa taciş wist ne xak
yekser sipawsan yeqe kerdin çak
watşan sed ḧeyf şazadey bê bak
telîsim zengułe yekser kerdî pak
nesrułay ḧekîm wat ey padşa
eger şamohrê perêm bo peyda
şa ke îd şineft dest kerd we beẍeł
muhir suleyman awerdiş we ber
dîşan şazade ẍeltan xaken
serta pay temam yekser çak çaken
daş be nesroła ḧekîm derdan
ḧekîm wat be’zê şêr perêm baweran
şa ferma derdem şîr ḧazir kerdin
şîr çenî ’eseł amête kerdin
muhir suleyman qatîy şêr kerdin
pey pey tenawil şazade kerdin
ta de řoj temam dewa dadin pêş
dan be şazade ew merd diłřêş
řojî yazdehem dîde kerdiş baz
dîş xatûn celaş nîşten bedłiwaz
guław merêzo berûy demaẍiş
heta řoşin bo çeşim û çiraẍiş
ḧekîm û wezîr şay ’ebdureḧman
gişt des be du’a bedił be zuban
be dergay kerîm qazîwilḧacat
şah û şehryar kerdin munacat
xeylê nîga kerd şazadey salar
dîş noş aferîn hîç nîyen dyar
watiş ey xatûn kon noş aferîn
ye beko berden selîm bê dîn
şazade watiş xatûn şîrîn
bełku peyda ken şay noş aferîn
şay noş aferîn melîk gewher tac
selîm le’în berden be tarac
tełeb kerdişan ew murẍ guzîn
bełkim peyda key şay noş aferîn
murẍ wefadar ba bişo weřa
bişîn we serwext şêr kîne xwa
ta çil û yek řoj dewa bidaşan
daxił be ḧemam şahî kerdişan
şîn we ban text nîştin berqerar
çenî xatûne xanim nazdar
nîştin çenî hem be xatir guşa
ta noş aferîn çun bibo peyda