wifat nimudin lîlî ’amrî û agahî yaftin micnun
From the Book:
Leyla û Mecnûn
By:
Khana Qubadi (1704-1778)
7 minutes
901 views
nîzamî pey fewt leyl ’amîrî
bey ter dan dad şî’ir û şa’îrî
ḧukim tebî’et kar kirdigar
îqtîzaş pasen ce her řozgar
şadabîy behar payîz xezanen
germay tabistan zimsan bêzanen
sebzey beharan ce payîz zerden
germîy tabistan zimistan serden
çun qarurey aw ce nesîm bî serd
řuxsar baẍat payîz mebo zerd
şaxey dirextan bergiş meřêzo
nergis û şimşad textiş mebêzo
sipay semen sext mawe řo şikest
guł namey ẍemş megêro be dest
pey ze’îfîy ḧał ser sebzey çemen
esrîn meřêzo hewrekey behmen
serterz mêwan we řûy seng xak
meftûl mepêço çun mar zeḧak
bad muxalf çun meyo ce dûr
gełařêz berg direxten me’zûr
awan ce ’ereq lafaw megurîzo
ce enêş bad bergiş meřêzo
nazk cigeran baẍ řencûrî
şîrîn nimekan mayey mexmûrî
uftade egûr hîndûy kedîwer
tac tak we ser zeng xedîwer
sêb zenex surx bew seringûnî
medo ne zenex enar ke çonî
henar cigerxûn kef kerdey wêş
hûnaw meřêzo we řûy diłey řêş
piste ce serdî baz mebo dû leb
’unnab herçî dûr lêş megêro leb
bełê ce daway wey tewr xezanê
zam yawa we ser sergułistanî
leylê sehî seru ce serbułendî
gina we çay jerf ce dedmendî
dîdey bed şana beharî baẍiş
bad tepançe da we çilçiraẍiş
ew ser[bend] şedey zeřîn mepêça
çadir û çex şewřewîn mepêça
ew nazk beden dîbay qesebpoş
zerd bî çun qamet qaseb tehîpoş
bedir dû hefteş bî we hîlalî
sehî seruş bî we tapoy xałî
sewday derûnş ce ser kerd te’sîr
sersamîy serş ce dił bî cagîr
germay temûzî jałey leylê berd
bay xezan gułberg laley leylê berd
teb û lerz lerzan şîrîn peykerş
baz girtiş le ban şehd şekerş
ce zemîn daney ’umirş şendewe
serbend zeřîn ce ser kendewe
bałîn tełeb kerd bałay çun seruş
pyade bî ce zîn şîrîn tezeruş
be zarî û şîwen dayeş kerd awaz
awerdiş we nizîk perê îfşay řaz
watiş ey mader çêş kerîn tedbîr
ahûy beř zehir werdiş çenî şîr
ginan we koçgay hamseran řextim
sist bîn ew e’sab endam sextim
hûn wêm werdim ce mîhrebanî
gyan yawa be leb ce zîndeganî
ewen we penhan hûn dił werdim
ce dem û dehan ha yawan derdim
ta gyan ce lêwim naman we bêrûn
ba wa çom be to gird řaz derûn
çun perde ce řûy esrar hordarum
xudaḧafîz ce î cehan mewyarum
dû destit bawer buzom ne gerden
hûn min û qeys amat we gerden
melûḧ û mehdî baboy qeys û leyl
xasşan nekerd qeti’ řagey meyl
ce peşîmanî beran nedamet
dawerî û dîwan wadey qyamet
yek sał herçend bîm hamser şewher
nasfite menden nazenîn gewher
neyawam be kam hêma her bîkirim
eda û bab hîçkam nebîn ce fîkirim
ew leḧze wa gyan be ḧeq mesparim
merdim ce dûrîy dost diłdarim
surmey dîdem ker we gerd pay yar
nîlîy bergim ker we ferş pay yar
ferqim be guław esrîn biker teř
we dûd derûn bînîm mu’etter
dehanim horpêç we berg guł zerd
kafûr paşîm ker be henasey serd
kifnim hûnîn ker çun min şehîdim
bergim qirimz bo çun berg ’îdim
ařastey biker çun new’erûsim
bisparim we xak ew perde bûsim
ew awarey min çon mebo aga?
min aware bîm ce î weten gah
mezanom ew qeys perê sugwarî
meyo we selam î zeř ’emarî
menîşo we ser xak giłkoy leyl
necay yar we xak taze kero meyl
menało be zar be soz derûn
ce şadî ḧeqen beyom we bîrûn
çun ew meḧbûb û hem ’ezîz yaren
necay min we lay to yadgaren
ew pey min postî piłeng kerd we koł
pey min girt newer byaban û çoł
pey min bî mûnîs weḧşîyan herd
pey min terk text padşahî kerd
wêş aware kerd ce qewm û weten
pey min berg xas şahîy kend ce ten
pey min řiswa bî ce naw xas û ’am
pey min cwanîş neyawa be kam
pey min bî tane ce duşmin û dost
wêş kerd we miştê îstixiwan û post
to pey řazî min dostiş bidarî
newînî we qeys yek dîde xwarî
ewa min lwam çenî diłekem
amanetîy to û tenya gułekem
herçî watim pêt we qeys bwaçî
wer ne cerg min we têẍ mepaçî
çun ’ezîzmen ba ’ezîzit bo
ne cagey ferzend ba temîzit bo
waçe çun leylê cey dinyay diłgîr
pare kerdiş qeyd silsiley zencîr
çenî mîhrî to ten siperd ne xak
teslîm kerd be yad to řewan pak
ce řay ’aşiqît sadqîş kerden
gyanş we ser kar ’aşiqît berden
ta axir ’eded nefes şimarş
ẍeyr ẍem ’eşqit hîç nebî karş
ew leḧze ce ẍem tek û tenha merd
xem û hîcrî toş we toşey řa berd
îmřoj ke lwan we neqab xak
be hewa û hewes ton derdinak
çun muntezîran cey guzergawe
takey yawî pêş bişî we řawe
midyo we řaket çem we dimawe
takey tawî pêş bişî we řawe
řaḧetiş biker we întizarî
farẍ bo ce dest xezênedarî
êd wat û řagey ne ser girt ne pêş
pey dar ’uqba û aramgay wêş
nam xudawend awerd be ziban
çem poşa ce î zemîn û zeman
gyan wêş teslîm can canan kerd
daẍ we diłey dos mîhrebanan berd
nam xudawend awerd be ziban
çem poşa ce î zemîn û zeman
řaḧet bî ce des xusey û dax û derd
endam gułîş bî we berf serd
waldeş yanê dayey pîr ew
daẍ dîdey dewr zemîn gîr ew
dya new’erûs kinaçey nakam
bew tewre be mirg yawa be akam
me’cez û serbend ce ser şendewe
mûy sifîdî ser yek yek kendewe
řuxsar piřçîn be naxûn hor kend
wêş west we řûy ne’iş nazenîn ferzend
pîrane girya we řûy cwanîş
hûn wara we řûy aw zîndeganîş
ga esrîn řêza we řûy serînş
ga bew řûxsar şêwey şîrînş
çiřîş we bawan we qewm û xwêşda
waran we serne’iş ew derûn řêşda
yeqe pare bî ziłf xam biřyan
berg qełaxî ser ta pa diřyan
bû we şîn û waweyla û řo řo
watî qyamet berpa bî ne řo
ce dimay dad û fuẍan û feryad
giryan û esrîn zayełey zyad
mader esasey sefer saz na
bew tewre leylî ’erûs řaz na
wat ye new’erûs qeys çołgerden
ey xak emanet be tom siperden
nyaş be kefen dimay şist û şo
be ayîn dîn berdiş we giłko
siperdin we xak nazenîn leylê
mader û xwêşan çenî waweylê
gêłano dima be ah û zarî
girdîn syapoş pey ’ezadarî
xatûn xeyme çoł bî ḧesarî
řaḧet bî ce des xezênedarî
xanaPen name çend xanan xatûn û xanim
berîşin cey dinya daxî daxanim
twêş meşî be xeyr be nûr îman
yařeb ce gunah tewbe û peşîman