wifat nimudin abin alsilam şuhir lîlî
From the Book:
Leyla û Mecnûn
By:
Khana Qubadi (1704-1778)
5 minutes
807 views
nîzamî ce qewł beẍdadî selam
wey tewr tenzîm kerd î şîrîn kelam
ew îbin selam şewher leylê
yeksał bî hamser leylê piř meylê
we yek nezare cew şadman bî
şerîk řefîq ẍem û ḧîrman bî
ce qeza û qeder qadir lamewt
ama perê se’d meşhûrnamey fewt
fût û fenay ew pêş kirya î’lam
teb û lerz yawa we îbnuselam
řaḧetî mezac řextiş pêça û best
î’tidal tebi’ qarurş şikest
çwar ’unsur be hem kerdin îxtilaf
cisimş bî we cay me’reke û mesaf
ḧekîm ḧazq awerdin belaş
beł pey deway derd se’d kero telaş
qarureşnas nebziş fişar da
nişaney nezdîk mergiş dyar da
şerbet û derman perêş da cewaz
awirden perêş meyl kerd be diłwaz
kemê î’tîdal mezac bî peyda
perhîziş şikest teb bî hweyda
řoj be řoj teb û lerziş zyad bî
laẍir û ze’îf, sist û berbad bî
ce zelzeley sext teb û lerz û taw
benay beden cur mûxiş bî we aw
murẍ ḧeyatiş berşî ce qefes
ama we payan şumarey nefes
şî we merdeşor, ne textey çûb, merg
sifîdîy kefen kirbas kerd we berg
be î’tizaz xas ayîn îslam
siperdin we xak ew îbnuselam
leylê çun tûtî esîr ce qefes
řeha bî û kêşa çun bułbuł nefes
herçend ce wîsał şewher bî me’yûs
emma çun sałê çeneş bî me’nûs
be ḧukmî fîtrî ’atîfey beşer
qełaxî poş bî çwar mang û ’eşer
ce derd fîraq şewher nakam
menała be zar xolasey kelam
be zwan pey se’d be dił perê qeys
esrîn meřêza wêney seyl ẍeys
be řesim ’ereb berg řeş poşa
yeksał ce eẍyar şadî nenoşa
we ebyat xas eş’ar diłgîr
dostiş melawan ce şam şebgîr
xof û xeter û řahbendiş nemend
xergaş xełwet bî pabendiş nemend
ce dimay yek sał ḧebis bêtawan
leylê bêwe bî yawa we bawan
ce endûh û ẍem dinya řistew
des nya we řûy xas û kestewe
namaş we nezer dinyay dûn
ẍeyr mîhir mecnûn serîr wajegûn
her be yad ew ’aşiq dêrîn
mewatiş eş’ar abdar û şîrîn
te’amş kem bî nehałş nabûd
bê xurd û bê xwab bê sewda û bê sûd
xorakiş ẍem û xawiş xeyał bî
ce hîcran qeys şadîş betał bî
ze’îf û laẍir řoj ce řoj bedter
wezi’ zîndegîş gina we xeter
mezanan mecnûn çun wêş natewan
haz paş nîyen pey řage luwan
de’wetiş nekerd ce ew xerîdar
pey şadî û sirûr tecdîd dîdar
wat wesen pey qeys sengîn bar ẍem
ba ze’îfîy leyl newîno we çem
yek wîda’name û xudaḧafzî
tenzîm kerd bey tewr be dił ’aczî
mecnûn be yadit, mecnûn be yadit
be sewday bêsûd wêney ferhadit
be řenc ’ebes temam berbadit
be xatir xemîn temam naşadit
nimeşîm ce yad her ham ce yadit
řenceřom perê řencî berbadit
azadim biker, kerdim azadit
’eşq min çun wêm kerdiş berbadit
î name mujdey wadey mergimen
syahiş sewad bext û bergimen
cewherş surxîy hûn cergimen
sifîdîş şêwey kifin û bergimen
’umirim bî temam ce sewday ’eşqit
hawkar bîm ce meynet meşqit
toyç daym çun min meyneten meşqit
meşhûr bî ne’am řîswa’îy ’eşqit
er mepersî ḧał meynet derdeket
’aşiq û sadiq diłisperdeket
meḧbûb meḧcûb pişt perdeket
amanet genc pê siperdeket
ze’îf û zigar, xeste û natewan
matemzedey ẍem bê dem û dewan
sengînîy barim řojan û şewan
amadem perê qyamet lwan
hîçim nemenden ce bunye û qamet
bêcge ce gencim saẍ û siłamet
baqîyen pey to ta řoy qyamet
şehîd ’eşqim nîyen mełamet
qeys û mecnûnim dos û diłgîrim
hamřaz û hamferd şam û şebgîrim
’emozay ’ezîz edîb û jîrim
’ezîzter ce daẍ, hamşîrey şîrim
dos diłpesend byaban gerdim
şerîk şadî û ẍem şefa pey derdim
goş dero mefad xatmey ferdim
ẍemgînter nebî eger min merdim
sed çun min ne bo to bay siłamet
dîden dîdar ferday qyamet
ba boy herdûman berdin nedamet
eger leyl nebo qeys bo sełamet
nameş da we des yek meḧrem řazî
berdiş welay qeys be diłnewazî
qeys nameş wana derdiş dêwya
çun ahûy tenya ser lêş şêwya
netawa cwaw nekêşa nefes
qasîd we tacîl gêławe wepes
xana şadî û ẍem ta ser perê kes
nemenden penam be zat eqdes
xatmey ḧusin bikero î’ta
we min û îslam, zat bêhemta