bay şemał řêşen
From the Book:
Dîwanî Xanay Qubadî
By:
Khana Qubadi (1704-1778)
3 minutes
1292 views
bay şemał řêşen, bay şemał řêşen
suftey dił be daẍ meynetan řêşen
ne yar ne yawer, ne qewm ne xwêşen
kes nimezanan ḧał min çêşen
le ’aciz ’aciz, ce pîran pîr bîm
ser le kotełan, pa le zincîr bîm
qubad û qoçaẍ, qedîmsałan bîm
baboy begzadan kemerlałan bîm
mîrzay xatûnan, şox şîrîn bîm
kakey kinaçan, zułf ’enberîn bîm
saḧêb otaqen, eqreba û piştim
destigîr destidar, begleran giştim
’êlbegî û řeşîd, mîr cafanim
perwerdey say çîn, zułf kiłafanim
bewr bałades, ban şêranim
namîdey wiłat řom û êranim
qoç ser ne pêç, wayey heyhatim
şêr sefşikên, koy zor û zatim
daray demaẍberz, keremkuławim
ustadan ce terḧ, coy sêłatawim
tekyey řahdaran, şay semawatim
defterdar mułk sercoy kawatim
baş bałades pehlewananim
qełẍan lay şan newcewananim
turk tîr’endaz, şîrîn swarim
tewrzîn be doş řûy nohewarim
behar pay êłax, ce kurdemał bîm
ce pay serawan, çeşmey zułał bîm
qubad qoçaẍ koy newsiwarim
terḧ cebłekêş baxçe û ḧesarim
sułtan harûn, mîr seryasim
saḧêb nawak, tîẍ ełmasim
mîr serḧedgîr lay xan aşûrim
le te’ney bedan, yanexapûrim
îsta min destax koteł pawenananim
bê ced xayn bacełananim
be řoj bêxurd û be şew bêxawim
dîl bêtawan, paşay zehawim
uftade û zebûn, xatirpeşêwim
teşne û zubanlał, şew bar be lêwim
newey emîrxan, beçey bêbakim
bê ferş, bê bałîn, uftadey xakim
îsta řûgerdan qapîy muradim
ebłey mayepûç xizmet we badim
ey badî şemał, ye ceste û ḧałe
ye gunay peřgerd zerdîy cemałe
ye laşey zebûn bênazkeftey min
ce nałe kosar şew nesreftey min
ye camey cyaz duř newkafûre
ye giłkoy mezar geda desûre
ye kelwelay zam, zułim sałane
ye ’eyş û waweylay mîremałane
ne şerim, ne sîret, ne zułf, ne xałe
ye perdey řengîn textey řeşmałe
ye kar gerdûn bînay karane
begzadan serkiz, say talarane
ey badî şemał! fire zelîlim
wêney ’areban, be to dexîlim
’erzey ceste û ḧał ême û esîran
bere pey otaq begzadey mîran
gileyî û şikat fire û napyaw
şer’ min û to, meqsûdî zehaw
maceray pîrîm, sikkey sipîdîm
me’lûm bî celay xaney řeşîdîm
baçe newtûł nemaman, naweran zaman
bewandey giryan, teř biken daman
neçnan be şad, nenîşin bêẍem
nemałan surmey sêwengî le çem
pełas qetran bişan we gerden
bew şerit bwaçan: kakeş nemerden
baçe bew cahîlan qewm û qardaşim
ew çapuksiwar, le meydan başim
emanet ferz bo, fesił beharan
er meçin be seyr qedîm hewaran
her le germesêr ta banleylax bê
her le řûy kohsar herta bobaẍ bê
her ce řûy xaken, her ce toy ẍare
firawan be kar, desgam dyare
çendê destikerd min, menden le cêda
yaran ba beyan, bigrewan pêda
çendê keramat ’ecayb kerdim
yaran sełamet, ewa min merdem