wełamî xana bo mîrza şefî’ mîrzam ye çêşen
From the Book:
Dîwanî Xanay Qubadî
By:
Khana Qubadi (1704-1778)
6 minutes
784 views
mîrzam ye çêşen , mîrzam ye çêşen?!
nimez diłřêşî biram neçêşen?!
pey mał dinya xatirit řêşen?!
řas waçe ce lam melûlît çêşen?!
ey dem û desgay derwêşît çêşen?!
ey geşt û guzar, diłřêşît çêşen?!
pey çêş megêłî pey firîştey wêt?!
pey çêş wêt kerden we ebłey serşêt?!
qadir be qudret ezeł her wêşen
padşay bêçûn wêş bê’endêşen
be’zê małdaren, be’zê diłřêşen
esrar xelqet ḧîkmet wêşen
be’zê diłşaden, be’zê diłřêşen
be’zê ḧeqşinas, be’zê bedgêşen
terefeyn ce esił ser řiştey wêşen
îna ne teqsîr firîştey çêşen?
pêşînyan pêş bawere we yad
her ce şay merdan ta we keyqubad
fîr’ewn û nemrûd, şeddad bin ’ad
zuḧak, fereydûn, hem kawey ḧeddad
pîr û pêẍember hem aba û ecdad
xasan xełasan be řeḧmet ban şad
ewan neyan kerd, dunya temame
mîrzam gêłyay dewr dunyay to kame?!
***
şay merdan ke der xeyber kendewe
bew têẍ û terkeş, kemerbendewe
bew gurz û keman, bew kemendewe
bew keştîy deryay zeřqul bendewe
ḧesen bew danş ḧeqpesendewe
ḧezremey ce des mecûs sendewe
ewan neyan kerd, dunya temame
mîrzam gêłyay dewr dunyay to kame?!
***
cimcime bew gişt sipa û sanewe
keyan û ereşk we sasanewe
behram we emlak xurasanewe
meḧbûbîn bew dił herasanewe
ebdał we ewtay xewasanewe
cey dinyay bêpo tewasanewe
ewan neyan kerd, dunya temame
mîrzam gêłyay dewr dunyay to kame?!
***
zahîdan we fikir řizq ḧełałewe
’abîdan deyr, dem we lałewe
maderan meşẍûł we minałewe
pideran pagîr we ’eyałewe
bêmałan we ah zûlcełałewe
małdaran we fikir pûł û małewe
ewan neyan kerd, dunya temame
mîrzam gêłyay dewr dunyay to kame?!
***
fereydûn we fikir berzîy nawewe
qarûn we direfiş çermîy gawewe
newşîrwan we fikir beḧir sawewe
fwanş kerden we semawewe
ḧacyan we fikir řêgay kawewe
ẍewwasan pey duřiř ce jêr awewe
ewan neyan kerd, dunya temame
mîrzam gêłyay dewr dunyay to kame?!
***
xesrew bew supay gyû û tûsewe
tûs zeřîn kewş be ew kûsewe
řostem bew leşkir eşkepûsewe
bew ḧełqey kemend we qerposewe
qeyser bew leşker řom û řûsewe
îflaton bew ’îlim beşerdosewe
ewan neyan kerd, dunya temame
mîrzam gêłyay dewr dunyay to kame?!
***
feẍfûr be fîl mengelûsewe
erestû be fîkir feyleqûsewe
feramerz bew têẍ sendey řûsewe
ferîburz bew şewq new’erûsewe
syaweş bew hûn piř’efsûsewe
firîştan bew zîkir ya qudûsewe
ewan neyan kerd, dunya temame
mîrzam gêłyay dewr dunyay to kame?!
***
suleyman bew ceyş cînin û însewe
bew qałîçe û text cewher ḧusnewe
ew be firman bad kesnepirsewe
teyr û şêr û bewr, piłeng, xirsewe
bew xûg ejder «abin al’irs»ewe
bew zat załey kesnetersewe
ewan neyan kerd, dunya temame
mîrzam gêłyay dewr dunyay to kame?!
***
adem û ḧewa be ewladewe
ḧezret nûḧ bew ’umir xuwadadewe
qarûn be ew geng dûr’uftadewe
dawid bew sin’et berg puladewe
eskender bew ceyş bêsamanewe
deqyanûs bew zułim bê’amanewe
ewan neyan kerd, dunya temame
mîrzam gêłyay dewr dunyay to kame?!
***
xurşîdşa bew ’îşq xeramanewe
xesrew bew xwace û ẍułamanewe
muctehîd bew ’îlim ’almanewe
we qehir û kîney załmanewe
ewan neyan kerd, dunya temame
mîrzam gêłyay dewr dunyay to kame?!
***
holako û cengîz we teymûrewe
bew kelley minar zułim û zorewe
îrec we sipay selim û tûrewe
nadirşa bew tac kohî nûrewe
xaqanî çînî we feẍfûrewe
kerîm xan bew ’edił bêqsûrewe
ewan neyan kerd, dunya temame
mîrzam gêłyay dewr dunyay to kame?!
***
pêẍemberan gişt bew î’cazewe
bew lutif bêḧed bênyazewe
muḧemmed bew feził bê’endazewe
bew lutif bêḧed bênyazewe
bew ḧukim qur’an şîrîn řazewe
bew nam û namûs ser’efrazewe
ewan neyan kerd, dunya temame
mîrzam gêłyay dewr dunyay to kame?!
***
esḧab bew ’îzzet, be wîqarewe
’elî bew tîẍ zulfeqarewe
bew ’îlim û huba û îftîxarewe
’umer bew tedbîr kesnedarewe
emewî bew xułq bedkirdarewe
bew kîney dêrîn be muxtarewe
ewan neyan kerd, dunya temame
mîrzam gêłyay dewr dunyay to kame?!
***
şefî’ şa’îr, nîzamî sîfet
mucrîy me’anî, kan me’rîfet
biray biłind qedir, danay gewherřêz
lałbexiş qeyd, be wêney perwêz
mîrzay mu’teber, mertebe ’alî
mudîr meḧzer mexsûsey walî
munşî başî baş, xasey sertełan
mustewfîy dîwan xan erdełan
çend xoşniwîsan wêt’asay řûy dewr
şîrîn kelaman, şîrîn terz û tewr
me’lumat bê şo, mu’teber meşhûr
me’rîfet manî’ be danş meẍrûr
îflatûn faman eresto destûr
luqman luqmanan, ne xak bîn mestûr
ewan neyan kerd, dunya temame
mîrzam gêłyay dewr dunyay to kame?!
***
hîç meber zwîr daym bot sefa
wêt meder be ẍem dinyay piř cefa
ezeł ta ebed her êden karş
řojê pey kesê germen bazařş
danayan bazař ewan kesaden
dinyay peř aşûb fîtnir û fesaden
xanaPen name wêney to, toyş wêney xana
dewreman wiyerd hana hey hana