gumřay seringûn
From the Book:
Dîwanî Xanay Qubadî
By:
Khana Qubadi (1704-1778)
3 minutes
1092 views
gumřay seringûn, gumřay seringûn
gumřay bêxeber, gumřay seringûn
şew û řo nefîkir coyay dinyay dûn
ẍafił ce kerdey karsaz bêçûn
wêney werînan ewlad adem
we koşîn berşîn ce dinyay matem?
kwanê murselan şerîfkerdey ḧeq?
kon meşayxan subxêz şefeq?
kwanê îmaman řehber neřay dîn?
kon mûsay kelîm guzîdey yeqîn?
kon řeng řewneq yûsif ken’an?
kon dêwan dêw ḧukim suleyman?
kon şu’eyb û şîs, ’îsay bin meryem?
kon «xilîl alilhArabic», cercîs û adem?
kon seday tekbîr ne’retey ḧeyder?
kwanê «zwalifqarArabic» biřindey dûser?
kon nam û nîşan eḧmed û meḧmûd?
kon nûrseday sub neẍmey dawud?
kon ḧesen, ḧusên, al pêẍember?
kon çwar yaran řesûl serwer?
kon tîp quşen esḧaban temam?
kon ḧemze û ’ebas, bewran nêknam?
kon pîran pîr dana «zwalcilalArabic»?
kon swar ẍeyb, weys yemen mał?
kon musennîfan ’îlim şerî’et?
kon ewlyayan deryay ḧeqîqet?
kon şan û şewket ’ebdułła û ’umer?
kon tac lewlak řehnuman řehber?
kon îmam qasim, mîr turkistan?
kwanê bayezîd qutib řûy cîhan?
kon ’ebdolmenaf, çenî ẍezalîd?
kon ebase’îd, xalîdbin welîd?
kwanê îns û cîn neřûy serzemîn?
kon pehłewanan sam sehmigîn?
kon zał û řustem, behram gořgîr?
sa kon keykawis, padşay dilîr?
kon bahûy berz, feramerz şêr?
kwanê cehanbexiş, ejdîhay dilêr?
kon birzû û teymûr, çenî řûyînten?
sa kon neqaşîy ferhad koken?
sa kon leşkir gewran mel’ûn?
kwanê mo’tesem, kon destigay qarûn?
kon fîr’ewn, mekerd de’way xudayî?
kon qarûn ẍerq, genc dinyayî?
kon mułk û emłak bazař nemrûd?
kon tac û tomar şeddad merdûd?
kon nezim camî, duřiř sedefřêz?
kon mewlay řomî? kon şems tebrêz?
yekser koç kerden şîn wecay muqîm
nîm ehil beheşt, nîm nar ceḧîm
be’zê gîr bedest ahîr sozen
be’zê cemînş giřan newrozen
be’zê sozanen sertapay qedem
be’zê diłguşad, ew nedaro ẍem
be’zê şermesar kirdar wêşen
řoy «yum almatArabic», herkes be wêşen
be’zê řûgerdan řoy qyameten
be’zê meskenş maway cenneten
be’zê giriftar ’ezab sexten
be’zê ser’efraz şah serwexten
be’zê bêqerar, dîde nimînen
be’zê na’umêd îman û dînen
be’zê mepoşan ce ḧewley ḧerîr
be’zê muqeřřeb padşay kebîr
be’zê menoşan ce ḧewz kewser
be’zê sakînen ce qubbey eḧmer
be’zê întîzar lutif ḧemîden
be’zêşan meşẍûł zîkir û tewḧîden
be’zê ’eyşişan çenî ḧorîyan
be’zê farîẍen ce řewzey řîzwan
be’zê melerzo ce xof sîřat
be’zê meřêzo esrîn çun sêłat
be’zê mekêşo herdem ah serd
be’zê be ’emûd mekeraş be gerd
her yend minałan, mekeran zarî
fêşter derdişan pey mebo karî
diłe bizane îne we’ziten
to çî? çun yane sizay sextiten!
sa gêre negoş pend û nesîḧet
wiyerd we kirdar kesb axîret.