sengî sufîd řeng
From the Book:
Dîwanî Seydî
By:
Seydi (1785-1849)
2 minutes
1274 views
sengî sufîd řeng, sengî çerme řeng
sengî naz perwer ce baẍçey guł řeng
řengit çî çermen çûn řengî kafûr?!
çî sufîdî řeng dyaren ce dûr?!
ke seng êd şineft ama be cwab...
watiş: ey sadar feqîrî bê xwab!
min nizîkena be bałay guł řeng
řengem çermêne çûn řengî fereng
sufîdî řengim daym dyaren
çermeyî řengim ne sayey yaren
ta min înana ne baẍçey dułber
řengim mefařyo hergîz min ce «wer»
ca min ce weşî û nizîkî yarim
diłim řoşna, ’eynî weharim
dûrbay dûr ginû ce bałay yarim
xatir perêşan, řeng sya tarim
ger min ce bałay yarim bû cya
řengeyşim fařyo, meneyş meḧała
ger dił perêşan, řeng sya tarim
dûrî dułberen, er min xembarim
řengem syaw bo, dił mat û melûl
ḧałim peşêw bo, cestem wêney tûł
cestem mesoço be wêney koy tûr
mebo be qeqnez, çermeyîm bo kor
yaran ye sengen girewo pî ḧał
dił çenî nebo be wêney zuxał
ye sengen bey tewr aramş nyen
pey dûrî azîz zamş karîyen
xo ce hûnen dił, çenî nebo aw
çenî nesoço bo be koy zuxaw