demeteqey pîrot û bayz
From the Book:
Bo Kurdistan
By:
Hazhar (1921-1991)
3 minutes
1709 views
çend sałêk lemewber hêndêk le kimonîstekanî nawxo řazî nedebûn basî kurd û kurdistan bikirê ke gwaye gelperestî weber markisyet nakewê! keçî kurdekanîş hawaryan bo azadî ’ereb û ’erebistan ekird û hîç zyanîşî nebû. lew serdemaneda em demeteqem nûsîwe ke lam waye wêneyekî řasteqanîye bo ew terze kesane lew serdemeda. bełam nabê le bîrîşman biçê ke êsta kimonîstekanî nawxo dan be mafî gelî kurda denên û layan waye ebê kurdistanîş wek hemû wiłatanî tir azadî xoy wergirê. laşyan waye ew kesaney ewdeme xoyan le basî kurdistan ebward behełeda çûbûn.
p: bayz lemeř to xeberêkim bîst
bi: xo min lemêje bûme kimonîst
p: pêm nałêy manay kimonîst çîye?
bi: bebê cyawazî xêr û xoşîye
giş řizgar debin gelanî zewî
ferqî namênê biłind û newî
debne biray yek sipî û zerd û řeş
hîç gelê nakirê le jyan bêbeş
řeşî efrîqa û sipîy lendenê
hertik wekû yek beşyan edenê
win debê nawî dîl û koledar
le qamûs deřwa wişey îstî’mar
p: oxey mam bayz bo mujdet oxey
ew dewre xoşey key debînim key?
ewsa lesayey êwe komnîstan
serbexo debê xakî kurdistan
bi: çit wit kurdistan? to gelperistî?
řêgey pêşkewtin le xot debestî?
nîzal û kîfaḧ nazanî çîye?
deyalektîkit aga lê nîye?
kê kelîmey kurd bênête ser zar
dyare qewmîye û pyawî îstî’mar
egerçî markis, îngilz, lênîn
dełên: bê ferqin gelanî zemîn
bełam pêşkewtûy ’arebî zana
em qanûneyan bo kurd wela na
çunke kurd le jêr çingî ’erebin
kurd serbexobin, ’areb geř ebin
bixiwaze gana û sudan řizgar bin
kurd bo ’areban ba her jêrbar bin
komełî sûrî cenubî çirûk
çon beřêdeçin bê newtî kerkûk!
dahatî şîmal le xoyan bibiřn!
qeracyan nebê, genim û co bikiřn!
hewałî ’areb hewaryan nawê!
hawîn çon bijîn dûr le şeqławê!
bê řonî koyî û mastî hewlêrî
biray ’erebman degrê şewkiwêrî
birincî małwan, tûtnî řewandiz
nabexşin bo sed markis û îngilz
zaxo û xaneqîn ta cebeḧemrîn
le dest xonadeyn bo giftî lênîn
p: başe mam bayz. ewe newt û řon
ba bo ’areb bê cehennem bîxon
ey bo azadî berg û zimanim
dełêy çî bayz, ta’ûnî gyanim?
bi: çî îstî’marî řec’î kirdûye
nabê bimênê hewał fermûye
be kurdî xwêndin tefreqe dênê
her kurdî gutin nabê bimênê
çoẍey fişufoł şede û camane
mayey negbetîy şe’bekemane
yekyetî manay patoł fiřê deyn
pêxawis biřoyn ’egal girê deyn
debê le merḧûm fêr bibîn edeb
xoy ’ereb nebû bibû be ’ereb
ba şîw’î kurd qewmîy ’ereb bin
her bijî ’ereb le ser û le bin
bi: bexwa mam bayz hêşta her kerî
key debye însan quřit beserî?
axir tom kurdî boye fewtawim
horem le xome boye qełşawim
yarî neyaran dekey xot bixon
kê bîstî lenaw çerxî taze û kon
meř le berxołey xoyan neban bin
biçin şîrderî bêçwegurgan bin
bo kurd bîrî to û beyar heryeke
bełam to bê çek ew xawen çeke
lenaw ’areba emtawênyewe!
seła le ’eqiłit be çawênyewe!