desteyekî cerde tûşî karwanêk ebin û...

desteyekî cerde tûşî karwanêk ebin. karwaneke řût ekenewe. le karwanekeda afretêk ebêt, afret cilubergêkî cwanî lebera ebêt. yekê le cerdekan mirxî xoy le cilubergî afreteke xoş eka. ełê emane bo jinekey min başe. afret ekêşête lawe ełê řûtewebe. afret ełê pyawî çak be, min jinim to çon wîjdanit hełî’egrê min řûtewekey? kabra ełê min emane nazanim řûtewebe, afret zor ełê û em kem eçê be gwêçkeya.

afret řût ekatewe, tenha derpêkey le pêya emênê, seyr eka derpêkeşî cwane, ełê ewîş dakene. jine ełê pyawî çak be, min mawmetewe em derpêye. axir çon ewîş bidem be to hemû leşim ekewête derewe, to hîç ẍîretî pyawetît nîye? kabray cerde ełê min emane nazanim ebê daykenî.

lew kateda pyawêkî řîş sipî der’ekewê. jine ełê ba ew pyawe bikeyn be ḧekem û nawcê û pirsî pê bikeyn, eger ew witî daykene û bîderê ewa etdemê, eger xo neşîwit ewa hîç. kabray cerde witî başe. pyawey pîr hat û jineş wa xoy girtimołke kirduwe û danîştuwe, řûy kirde pyaweke û pêy wit xałey řîş sipî! em pyawe minî řût kirdotewe, bem corey lê kirdum ke embînî, êsta mawetewe ser derpêkem ełê ewîşim bo dakene û bimderê. to ełê çî? pyaweke witî daykene û bîderê. kabray cerde îtir qisey swarbû, jine çarnaçar derpêkey dakend û ewîşî daye û xoy gułołebû danîşt.

kabray cerde hemû cilekanî pêçayewe day be şanya û řoyşit. zor dûr nekewtibowe kutupiř biruskeyek le serewe hat day le tewqî serî le xwaryewe derçû û kuştî û ciluberg lew naweda biławbowe. jine be her cor bû xoy geyande cilekanî û leberî kirdinewe û řûy kirde xałey řîş sipî witî to bo çi wat kird? xo min hanam hênaye ber to. xałey řîş sipî witî řołe min xidrî zîndem, boye wam pê witî bo ewe kaseke piř bibê, eger derpêket pê nedaye kaseke piř ne’ebû. zułim û sitem ke geyşte ḧedî xoy îtir ebê serewlêj bêtewe.