mîrzam ca kerden
namey jimare 5 bo hawserekey, ’elî ekber xanî erdełan, nasraw be şirf almilk
From the Book:
Şî’rekanî Cehanara
By:
Jehanara (1859-1911)
2 minutes
1045 views
mîrzam ca kerden ...
hîcranit bew tewr ne dił ca kerden
yekser sermayem saman sa kerden
xezaney ’umirim be fena berden
cew řo dił ne wesił bałat meḧrûmen
wêney bîmaran şew xawim şûmen
ten ce taw derd, nedîn bałat
meḧbûsen be des xan xeyałat
sipehdar xem hicûm awerden
qafłey şadîm, be tarac berden
şew ce şew fêşter şûmen şewgarim
we merden muştaq, ce gyan bêzarim
řowan řestaxêz řořoy berzimen
nałe ney asa, qeqnes terzimen
weḧşyan qerar, şew nałînmen
xełqan herasan, deng şînmen
ne her ca yek dem, ten sakin mebo
dûsed coy zûxaw ne zamim meşo
bałay seru’asam ce daxt xemen
dîdey ceyr asam řoşnîş kemen
gonay gułfamim xezanîş bîyen
’eyş û şadî û zewq ne destim şîyen
çûn leyl qedîm karê aman pêm
qewman û xwêşan, bêzar bîyen lêm
mîrzam gyan û to karî pêm aman
serawnen sed coy zûxaw ne zaman
fîraq aẍem, karê pêm kerden
we bê extyar řazîm we merden
zeřey nîm nefes, ce qefes benden
ewîç ne şadî, meyl to menden
mîrzam er neyo, ew nîme nefes
perwaz mekero ce kunc qefes
tayê cew kakoł sewdayî peldêz
medrewşo ce řeng ciqey şay perwêz
bider we enfas şemał xoş xo
bimało ne řûy, zam koney no
bełkum sakin bo dił ce şew nałîn
ba wes seyl hûn bişom ne bałîn
werne be mergit, yosifNamed-Entityy sanî
kenîz fewt mebo ce dinyay fanî