semayek lenêwan aw û agirda

řêbwarêkî şipirzem û
cantay destim piř henasey tenyayîye
perdet la de, be nîgayek bimdiwêne
emşew baranî dîdarêk
kêłgey diłim paraw ekat
le baxêkî efsûnawî
şewnimî çawî diłdarî
etkête ser gonay şê’irim
bîrewerîy ewînê sewz
be berzayîy bałay awyer
řûnakayî exate ser tase û bîrim
gwê hełbixeyn
padîwarî ewîndarê
bêdengîy şar eşłeqênê
şarîş daykêkî řeşpoşe
hêwir hêwir
tazyey ewînêkî nakam
egêřêt û
leber awêney firmêska
serupelkey azarekanî dadênê
perde la de
piřî tasey dîdartim
sałgarêkî êcgar zore
beser řojî koçeketa řa’ebûrê
sałgarêkî piř le birîn
sałî teqînewey pirsyar
giřkanî qîn
sałî qatuqřî ewîn
sałî sardibûnewey hetaw
sûtanî befir
sałî bêdengîy hawar û
hawarî berzî bêdengî
sałgarêkî êcgar zore
beser řojî koçeketa řa’ebûrê
ew řojey wa
dwa lapeřey dîwanî şê’rî diłdarît
řeş kirdewe û
îtir dway to
kesêkî tir xesrew xanî nelawano
lew řojewe
xesrew xanîş ziryanêke
wêł û şeyda
be kołanî xesrawada egeřêt û
berew awyer ser heł’egrêt
goranîy nakamîy xoy û diłdarîy to ełêtewe
ser be her kołanêka ka
guławî ’eşq epirjênê û
be birjangî tasekanî zulfî dûrît şane eka
toş ey xatûnî diłdarî
ta êstakeş dar’erxewanêkî berzî
çî kotre bo sêberî xoşewîstît bał egirnewe
boye her ke kiçanî şar
tûşî azareşê’ir ebin
yekser nêwî toyan be gwêda exwênin
tałê le ałayîy sozekanit
le meçekî xewekanyan e’ałênin
ey daristanî diłdarî û
nezergey ’aşiqanî şar
emşew yad û tasey dûrît
le xewêkî efsûnawî řayçenîwim
lêwekanim be wişey xem pişkûtuwe û
heta dê her pere egrêt
çen be qufłî sardî diłmewey enêm
çarî nakat
seyrî min ke
biřwam nîye emnasîyewe
sałgarêkî êcgar zore
herçî şewe
daristanî û le çawekanma şîn ebî
heta beyan lenêw qijta sema ekem
beyanîyan bonî wenewşem girtuwe
aw û agir emnasnewe
yekser bo lay tom ehênin
be dewr bałay here berzî diłdarîta
emgeřênin
le sêberî xewekanta
emxewênin