nameket pey çêş perê deway derd
From the Book:
Dîwanî Mewlewî
By:
Mawlawi Tawagozi (1806-1882)
2 minutes
954 views
nameket pey çêş? perê deway derd
yawa xas wanam mutałe’em kerd
ax, daxan nîşat ce bêx kende wêm
ray tedbîrî kes pê nemende wêm
seretay zuxaw ne cergim serdan
beydê pêmewe yaran, ham ferdan
hawar yanê hay xałom neşneften
ce no kosêter xasterm keften
dîdekem maçan bêwefayîş kerd
şerit û ’ehdî beyn werîn ce yad berd
zyad bî serdîy pey ẍem keylekeş
kem bî germîy taw kûrey meylekeş
heway dosî noş we derûn awerd
siftekey koneş yekcar ce wîr berd
dîdekem to meyl xestet zerûr bê
ey bêşertîye fire çêt dûr bê
xeylê watim xeyç êşî zamim merd
ay kulnatewe îne çêşt kerd
bezeyît nama bey zarîmeda
wey nałey şewan bêdarîmeda
wey diłey piř êş piř zuxawmeda
wey henasey germ tewentawmeda
min diłim we tîr to êşa, ya ew
min cefa û meynet to kêşam, ya ew
min wêm we sergerd bałat kerd, ya ew
min wêm fîday xak pałat kerd, ya ew
ce bedbextî wêm weneş waro seng
zanam bêmeylî emma nek wey řeng
min hîç ber kenar, eḧwałim mepers
xo qyamet hen ce xuda biters
xało derdî dił bênîhayeten
şikayet nîyen, ye ḧîkayeten
awayî pey ẍeyr, wêran małe wêm
’ałem şîrînkam, mezaq tałe wêm
naweş pê ḧełał, weş ḧerame wêm
şadî pê nuqsan, ẍem temame wêm
heło zedekey tirsyage wêm
diro bo ya řas hewesyage wêm
çi wextî amay înşay ferdit bê
çi wadey daway deway derdit bê
gilarawî merg çêge û çogemen
dexîl tedbîrê carê nogemen