piłing û peyker

le gyaneławî êwarey řojêkta bû
geyştime lat.
birînekanim her leber dergatewe
xoyan hawîşte baweşî řûbareket
ewîş hêwaş girtinyewe û
be dem maçî azarewe
birdinye şar:
eme toy min lenaw xewî
çend sałema
hemû şewê embînît û
destim exsite kemerit
beyekewe semaman bo
baran, lûtke, hetaw ekird!
eme minim «goyje»m bo to hênawete
pał «zawa –bûk»
ke şew dahat
be dû qołî ser exene ser şanman û
êmeş wird wird leber xowe
ew sirûdeyan bo ełêyn
ke yekem car lêre pişkût.
bimgeřêne!
neşarezay gelê şarî
çawî xomim
le diłî xomda win ebim!
- kwa çwarçira?!
tirsê nîgay tirûkanî
pencey awřit xiste ser
bêdengîyek, wekû kilûy
befrêkî mat
le bapêçî řuxsarmanda
tirûşkey kird!
ke řawestayn mêjûman dî
paşewpaş egeřayewe,
řojjimêrêkî dayne dest
le xorinşîn hełkêşrabû!
- ke wate min ḧewt sałan bûm
ke to «bûyt» û lêreda bû
xorit hêna û
etda le berokî «sabłax»
lêreda bû şanoyekit le gułałe
dirust kird û estêret pya heł’ewasî.
şayîy nêrgiz lenaw befra
eyxayand û çiraxanî momî pencey
dagîrsawî dirextekan
operêtî řûnakî bûn.
- kewate min ḧewt sałan bûm.
bestełekî bêdengîman
wextê şikan
ke çend zeřneqûtey axê
seryan lenaw singimanewe hênaye der
bebê ewey pêbzanîn le diłopî
awingî naw
estêrkekanî pêłûyan exwardewe!
witit: bełam îste lejêr
herdû qaçî peykerda şar
piłingêke ejno şikaw.
to biřwane! çon lenêwan
herde pencey peykerewe
heta emřoş xwênî heło kujrawekan
dêne xwarê û le çeqî gişt řêgeyekda
werzêkî nwê nawnûs eken!
to biřwane! «miḧemmed» çon
lenaw neřey şêrekanî
her çwar goşey baxçekewe
dête derê û heta îsteyş
peykereke etoqênê!
geřayn, geřayn
le pêçî her şeqamêkit û kołanêkta
geła, geła
serincekanim ewerîn.
nasyawim û nenasyawim:
cilekanim, camanekem, hendê wişem
pênasê bûn eyankirdime
kołî daykî xoşewîstît.
eyanbînîm kwêrekanîm
lenaw kawlaşî diłyanda
serlenwê eteqandewe
- qurbanit bîn
serniwîştiman wa le destî êwedaye
tuxwa başîn?!
qurbanit bîn!
geřayn, geřayn
kiçekanit pole guł bûn
le çarşêwî řengawřengida heł’efřîn û
leser liqî herdû destî hełlerzîwim
enîştinewe,
çiray memkyan eda le şextey řuxsarî
werîwî min
- tuxwa xełkî silêmanît?!
birya, birya
silêmanîm bidîtaye!
ey kiçî cwan leber birya û xozgey toye
serim dawe bew şaxane û
leber bokřûzî cergî toye ke min
gyanim kirdote çirawgî daristan û eşkewtekan
leber ew êske sûkete
řengim peřîwî naw temî
ser małanî silêmanî û ser êreye
ey kiçî cwan!
le gyaneławî êwarey řojêkta bû
geyştime lat
birînekanim her leber dergatewe
xoyan hawîşte baweşî řûbareket
ewîş hêwaş girtinyewe û
be dem maçî azarewe
birdinye şar!