her wekû tam û mezey ḧełwa le biřwêşa nîye
From the Book:
Dîwanî Narî
By:
Nari (1874-1943)
2 minutes
686 views
her wekû tam û mezey ḧełwa le biřwêşa nîye
zeřřeye bonî xwa dozî le derwêşa nîye
zelzeley axir zeman û řeẍbetî fîsq û ficûr
boye te’sîrî le soz û zîkirî hûkêşa nîye
nêr û mê yeksane emřo lay diłî dêwaneda
zergî ew ferqî le lêdanî pes û pêşa nîye
bê řyazet seyrî gułzarî terîqet muşkîle
lezzetî şîrîn le şaney şehdî bê mêşa nîye
taqetî barî emanet şêrî meydanî ewê
ḧemlî ew bare le quwey qatrî řêşa nîye
qet’î řêgey me’rîfet nefsî mutî’î lazme
ḧałetî nermî le kelley espî serkêşa nîye
daneyî lu’lu’ meqamî xezneyî şahaneye
gewherî şahî le řeşke û barî kakêşa nîye
espî nejdî lazme bo qet’î řêgey me’rîfet
sur’et û cewlanî nejdî qet le gamêşa nîye
gułşenî ḧeq bulbulêkî neẍmexwanî lazme
sozî ew neẍme le bałî zergete û mêşa nîye
bê xewî û xorake daym kar û pîşey tobekar
xo xew û têrî le xaney xełwet endêşa nîye
sefwetî sofî le şane û řîşda dernakewê
nûrî derwêşî le pirç û řeştî û kêşa nîye
peşme û ẍare le beynî sofî û derwêş û şêx
ew kesey yarî dewê kêşey legeł xwêşa nîye