řefîqî meḧrem ’îciz û sirûrim
From the Book:
Dîwanî Mewlewî
By:
Mawlawi Tawagozi (1806-1882)
2 minutes
964 views
řefîqî meḧrem ’îciz û sirûrim
ḧekîmekey êş zamî nasorim
awyarekey sewzey arezûm
dana be girdîn řazî kone û nom
demax we neş’ey ser berzan keyl
muřşîdî mîraw ser coy badey leyl
enîsî meclîs ’eyş û nîşatim
desgîrî řagey hat û nehatim
ciłew kêşî zewq ahûy řewêłim
bezmi’aray meclîs kemen we pêłim
we mergit yend xem ce lam bîyen cem
lawî hûn girten pay şerim meḧkem
zincîrî meynet pay gurîz besten
marekey dûrît řîşey dił gesten
samansam kerden derdekey fîraq
boy tałî dûrîm meyo ne mezaq
cew sawe azîz lêm nadyaren
seyrî ka’înat ne dîdem xaren
amoşoy yanem kerden wiyane
yeksanen ce lam qewm û bêgane
îltîcam be ton cay hanamenî
ne beyday hîcran řehnumamenî
yekcar ten xestey zar û řencûrîm
dił řêze řêzey kardî mehcûrîm
girmey kûrey derd koy taqet tawan
boy siftey cergim we gerdûn yawan
her řo ceyḧûnê meřêzo ne çem
saray dił bîyen we hûnawî çem
her satê derdê siza mido pêm
yek an zîndegîm ḧeram bîyen lêm
dexîl ta hała ten newyen we gerd
sifteş neberden we nałekey derd
řica ker eḧmedPerson lutfiş bo çenîm
xecałetî berz «kerîm» neyo pêm
werne ha mirdim, to bay siłamet
ba her bimano ta řoy qyamet