wełamî gwêgrêkî xoşewîst
selam le gwêgrî beřêz û huner parêzî bernamey tapo.
kak řeḧîmî behramzade le bokanewe nameyekî bo nûsîwîn û paş ewe ke nizay bo serkewtinman kirduwe le xizmetî gela, çen řexneyekî lê girtûyn û ême lem bernameyeda wełamî edeynewe. kak řeḧîm wa dyare gencêkî beşor û hunernase û derdekewê bernamey tapoy çen ḧewte ber le êstey gwê lê buwe ke lewda kutbûman nabê mawe bidrê ew şite nizmane ke emřo benawî goranî kurdî le naw xełka bawe pere bigrê. le namekeya nûsîwye ke êwe xotan zor karî wa eken ke xeyanete be hunerî kurdî. kak řeḧîm mebestî êmey karbedestî řadyoy kurdî buwew nûsîwye katê şî’rêkî kurdî exwêndirêtewe, pêtewîstî çîye ke lenawî hunermendêkî ke kurd nîye le mûsîqay ewan legeł şî’re kurdîyekeda kełk werbigîrê. eme řexney yekemîyetî. řexney dûhemî emeye ke boç ême her basî hunermendanî řaburdû ekeyn û lanî hunermendanî genc û emřoyîman berdawe. ew gwêgre huşyareman nûsîwyetî ke bełê basî xizmet û têkoşanî řabirduwan bekełke, bełam ebê bo gencekanîş ke tamezroy hunerin hengawêk binrê û řênwênî bikirên û han bidrên. řexney sêhemî emeye ke bo çî beste farsî û turkîyekan wer’egêřnewe be kurdî? emane ebne mayey lenaw çûnî řesenî ahengî kurdî. danerî aheng ke le xełkî kurd dûre û lenawyanda nejyawe agay le çiłonyetî ahenge beruwekan nîye, katê ke pêy ekutrê ahengêkî kurdî bo biławbûnewe leser řadyo dabnê, naçar pena bo ew ahengane ke ya turkîn, ya farsî û xoy le dananî ahengêkî taze řizgar eka. paşan ew ahenge ke bêguman piř be pêstî çêşke û hestî kurd nîye, şî’rêkî bê tam û bonî kurdî exrête ser ke tenanet şî’rekeş pênasî kurdî nîye. ca bîrî lê bikenewe ke lem naweda tenya wişey ahengeke kurdîye, negyanî şî’rekan, ne henawî ahengeke kurdî nîyn. kak řeḧîm paşan pirsyar eka axo em karey êwe baştire le karî goranîbêjêkî kem zan ke wişey nizmî dûr le xû û řewştî cwanî beser zimana dê û bewatey nûserî tapo ełê:«daykî ḧewt kuřbî pêt dekem ḧaşa»?!
biray genc û hêjaman kak řeḧîmî behramzade!
ême hergîz nemankutuwe ke karman bê kem û kûřî û kemayetîye. řenge zor kemayetî wa le karmana hebê ke gwêgrekan wek xoman şarezay nebin; behîwayn wirdewrde beser ew kemayetîyaneda zał bîn, bełam ewe ke êwe nûsîwtane basî hunermende gencekanîş bikeyn, laman waye ke ême le nasandinî ew bira behest û hunermendaneda, çi mûsîqar, çi şa’îr, çi nûser û ya deng xoş kotayîman nekirduwe, meger le hebûnî ewan agaman nebûbê, ke ewîş tawanî ême nîye. řenge ewe kemterxemî êwe bê ke agatan le bûnî şa’îrêkî genc ya her hunermendêkî tir hebê û be’êmey nenasênin. ême le hemû bernameyekda dûpatey ekeynewe ke bedestêk çepłe lênadrê. ême û êwe beyekewe etwanîn řaspêrîman bebaşî beřêwe berîn, çunke ême natwanîn û le wizemanda nîye hemû hunermendêk le hemû şwênêk binasîn, ke weha bû hemû gwêgrêk le seryetî ke hunermendanî şar û awayî xoy be’êmey binasênê, şwênewar û karyan bo ême binûsê û binêrê û êmeş řaspêrîmane ke eger şwênewarekanyan kełkî biławkirdinewey hebê benawî xoyanewe biławyan keynewe û karêk bikeyn ke lehemû şwênêk bînasin, bełam yek şit heye ke nabê le yad bikirê û ewîş emeye ke ême kořî nûseranman heye û her nûsrawêk çi hî nûseranî xoman bê û çi le layen gwêgrekanewe bêt ew koře bewrdî eyxiwênêtewe û biřway leser eda, tenanet etwanê eger leng û lorîyek le nûsrawekeda hebê destî têberê û çewtîyekan řast katewe.
ême zorman pê xoşe ke peywendêkî pitewman legeł êwe hebê, geşey karî ême bemewe bestirawe ke êwe le karman řazî bin; hełbet eme ke êwe le seda sed řazî bin, ne bo êweş elwê, çunke lew ḧałeda îtir ême xoman beraspêrîdar nazanîn bo berewpêş çûn û baştirkirdinî bernamekanman û êweş hewł naden bo dozînewî hełekanî ême û řênwênî kirdinman.
ba emeş le dwayî em baseda biłêm ke em bernamane giştyan bo êwen û hî êwen û baştir bû ke lekatî řexne girtina emetan leber çaw bê ke beşêk leberzkirdnewey bernameke hî êweye.
kak ḧesenî řesûłî xwêndikarî zankoy wêjey zanisgey taran pirsyarî kirduwe aya belay êwewe hunermend her beşa’îr û nûser ekutrê? eger latan wa nîye bo çi basî goranîbêjêk, neqaşêk ya mûsîqarêkî kurd naken?
wełamî kak ḧesen emeye ke nexêr hunermend belay êmewe her tenya be şa’îr û nûser nakutrê mûsîqar û neqaş û dengixoşîş hunermendin, bełam şa’îr û nûser lenaw kurda zortirin le mûsîqar û neqaş û hunerî deng xoşîş lew çeşne hunerane nîye ke bernamey leser binûsrê; her ewende ke dengyan le řadyowe biław ekirêtewe xoy çeşnêk nasandine. eger neqaş ya mûsîqarêkî kurd hebê û be êmey binasênin, zor sipastan ekeyn.
lêreda bernamekeman dwayî hat; ta ḧewtey dahatû xwatan legeł.