le kwêwe dest pê bikeyn û kê bîka?

le weramî ewda ke le kwêwe dest pê bikeyn; bê sê û dû dełêm: debê le kurdistanî ’êraqewe dest pê bikeyn. çunke emřo le kurdistanî turkya û êran û sûryada xizmetkirdinî zimanî kurdî be tawanbarî dejmêrrê. demênêtewe ser kurdekanî yekêtîy sovêt ke herçende ta endazeyek xerîkî zimanî kurdî bûn (ewîş be zorî tenya zaraweyekî şêwey kirmancîy jûrû), bełam ewanîş heta êste lem bareyewe hîç hengawêkyan nenawe bêcge leweş ew desełatey le kurdistanî ’êraqda heye, lewê çing nakewê. lemeş bitrazê eme maweyeke zana kurdekanî sovêt legeł zana kurdekanî ’êraqda bûnete aşna û le dawwidezgakanî kurdî ’êraqda hawbeşin. ke dełêm kurdistanî ’êraq bibête cêy destipêkirdin, çunke tenya şwênêkî kurdistane ke jimareyekî zor dawwidezgay zimanewanî û hunerwerîy lêye: zanistigeyekî lêye ke be hîwayn bo paşeřoj bibête zanistigeyekî kurdî, binkey «kořî zanyarîy kurd» lewêye, le qutabxanekanda be kurdî dexwênrê, çend řojname û govarêkî kurdî lê derdeçê, pirograme kurdîyekanî řadwê û telefziwênî ’êraq; maweyan pitre le hî şwênekanî dî. leweş bitrazê kurdî hemû core şêweyekî lê dest dekewê... kurdî ’êraq serbestitir û destřoyştûtirin le hemû kurdekanî dîy cîhan. leber ewe kurdî ’êraq detwanin ewey amade dekirê û biřyarî leser dedrê kemuzor bîxene meydanî karewe û her leser qaqez neyhêłnewe. bełam aye kê eme bika? le weramda dełêm: ewaney karbedestin, wata ewaney dawwidezgay syasî û zimanewanî û hunerî û xwêndewarî û řoşnibîrîyan bedesteweye. be kurtî ḧîzbe syasîyekan û komełe řoşnibîrî û hunerîyekan û beřêweberêtîy xwêndewarîy kurdî û serokayetîy zanistigey sileymanî û beşî kurdî zanistigey beẍda û yekêtîy nûseranî kurd û lepêş hemûşyanewe «kořî zanyarîy kurd». ke dełêm lepêş hemûşyanewe «kořî zanyarîy kurd», leber eweye ke em core kořane le her wiłatêkda bin, gewretrîn desełatêkî zanistanen bo biławkirdinewe û çespkirdnî hemû core danan û gořîn û çareserkirdinêk lebarey zimanewe. bełam ew pirsyarey lêreda dête gořê eweye; aye em komełey le ’êraq damezrawe be nêwî «kořî zanyarîy kurd»ewe û bem şêweyey êstey; em firmane pîrozey pê deçê beřêwe yan na? ewe dyare debê kemêk lêy bidûyn.