zikir wiqay’ sal bîst û pincim az wiladit saḧb si’adit û riftin aw bih şam û fayz şidin xidîcih bih misaḧbit an ḧizirit
From the Book:
Rewzetul Sefa
By:
Mirza Ebdilqadir Paweyi (1850-1910)
10 minutes
615 views
xedîcey kubra ḧeq řazî bo lêş
şay şîrîn endam bend ciger kêş
kinaçey xweylêd şay şîrîn xałan
serdar zumrey saḧêb kemałan
ce lay xatûnan qureyş û ’ereb
mewyara daym be şadî û tereb
ce mał dinya zînet û cemał
gonaş medrexşa çûn mercan lał
şanazî mekerd we genc û gewher
ẍenî bî temam ce tełay eḧmer
pey ehil tuccar wêney sersaye
yekser ce lay ew meberdin maye
ta ebûtalb ce qelîlî mał
dîsan ce kesret kiłfet û ’eyał
we xwacey ’ałem xeylê şikat kerd
watiş ye we ton derman gişt derd
xedîcey xweylêd ce řozgaran
međo şeraket zeř be tucaran
eger to be ew kerî êşaret
yeqîn mekyano to be têcaret
meyawo nef’ê be to cey sefer
seng serd pey to mebo we gewher
ḧezret zemîrş esrar ẍeyb bê
zebanş exbar sêdiq la řeyb bê
ferma qebûł bo nyazit ce ser
min hem xoşḧałim daym pey sefer
bełam êltêmas min be xedîce
êkirah mebexşo axir netîce
ẍerez, xas êđen eger qabêl bo
ewîç we sewday ême mayêl bo
nek ḧerfim ce laş bişo be heder
cew dima pey to bibo be keder
ebûtalb wat metersû yoter
wer ce to sêbqet kero pey sefer
çûn gifit û şinûd, cisticû û xeber
ebûtalb û çenî pêẍember
ew beḧse ew řo take xur’awa
be sem’ şerîf xedîce yawa
we mu’cêzey pak şay buřaq swar
mayêl bî wêş zeř biđo we xerwar
bew şerte ḧezret şeraket kero
ẍułamê emîn çenî wêş bero
peyẍam kerd we lay şay «xîr albişirArabic»
mustefay emîn salar meḧşer
şineftim to meyl têcaret darî
’erz kemîne me’zûr bidarî
bizan yeqînit eger ’azmen
êzhar ker be min her çît lazmen
ce şîrînî tam şîrey guftarit
ce esił exlaq ḧusin û kirdarit
yeqîn min hem tom we emîn dyen
xeyanet ce beyn min û to nyen
ew nef’e derûn ẍeyrê, metawo
mesłeḧet êđen be to byawo
qasd sefarş řêzey řaz şerbet
yawna we sem’ şerîf ḧezret
ḧezret teqrîr kerd we feraẍet bał
pey ebûtalêb çigûnegî ḧał
ebûtalêb hem be şadî û mezaq
watiş «le alḧimd ni’im al’etfaq»
watiş xuđawend sêř subḧanî
řizqêwen be toş kerden erzanî
cew dima ḧezret şay «xîr albişirArabic»
kerdiş tedarek esasey sefer
xedîce mayey têcaret da pêş
meysere namê hem ẍułam wêş
pey xidmetkarî şay enbyahan
hem pey waqê’at, beła ce řahan
ersed ke dêren menził hem dûren
ce be’zê kêtab wey tewr mestûren
xedîce yekê ce xwêşan wêş
emîn meḧrem zeř kêşan wêş
xuzeyme namê suxen sencîde
danay danşimend dił pesendîde
çenî meysere ew dû ham neberd
her dû ne xidmet ḧezret řahî kerd
qafłey qureyş we ’ezim sefer
řagey çołşan gêrtişan ne wer
ḧezret swar bî we pişt naqe
çenî ẍulaman şîrîn ’elaqe
ce ebûtalêb hêmmet xwahî kerd
we xatirxiway wêş fewrî teşrîf berd
menził be menził menmana ê’caz
keş û ko û kemer çenîş mekerd řaz
ce ’edił řa da, wađey ’esrê teng
naqey xedîce pay řastiş bî leng
maway hewłnak, řage xof û bîm
cya mend ce şon qafłey ’ezîm
xuzeyme hewł da ’îlaciş nekerd
ta axir hana we lay ḧezret berd
ḧezret gêławe xende kerdewe
ta ce lay naqe pa awerdewe
dest mubarek mała we pay ew
xeylê meşẍûł bî çenî du’ay ew
naqey pa seqet naga axêz kerd
bar wêş temam serbarş hem berd
nîşt ne canbaze mefřya çûn teyr
xuzeyme ce dûr her mekerdiş seyr
seđay zeng ew meşî we ferseng
pey gişt qafłe bî we pêşaheng
xuzeyme çûn ew emir ẍerîb dî
hem çend mu’cêze sext ’ecîb dî
watiş muḧemmed şe’inş ’ezîmen
fermûdeş meqam řay musteqîmen
ta yawan we cay tersa mezahêb
we lay sewm’ey nestûr řahêb
ḧezret teşrîfiş we lay sengê berd
meysere naqey ḧezret taqet kerd
ehil qafłe sakin bîn yekser
ce lay barxaney pak pêẍember
nestûr řahêb pey persa û xeber
nûr ḧezretiş awerd ew nezer
pelapel xêza ce şu’ley nûrş
ser qedem saxte, şî we ḧizûrş
’erz kerd xatirim peř ce endêşen
to lat û ’uzza, to namit çêşen?
ḧezret da cwab şox pesend xo
ferma to dayet her bê ferzend bo
min lat û menat we seg mezanûn
wêtan hem we seg dûzex mewanûn
axêz ker ce lam dûr ber we te’cîl
to beẍeyr ce but nedarî delîl
nestûr êḧtyat nûr ḧezret kerd
pey pey we zahêr kêşa ah serd
wat sewgend bew kes besîren bê çem
êncîlş kyast pey ’îsay meryem
îne pêẍember axir zemanen
xulasey mexloq gişt êns û canen
êta’ey emirş řistigarîyen
bê emrîş ba’ês giriftarîyen
belad gişt mebo wêney zeřsendeş
serkêşan temam meban we bendeş
ḧed kes nyen ce ẍulẍuley ew
kero ce mesaf muqabêley ew
duşmenan ew fêşter yehûden
gişt ehil exbar gumřay merdûden
newa firsetê baweran ce şew
byawnan zerer we endam ew
meysere çenî xuzeymey peř hûş
ḧerf nestûra gêrtişan ne gûş
êxlas ḧezret berdişan ne dił
yeqîn û baweř kerdişan ḧasił
dîsan hem ḧezret çenî yek yehûd
yehûd kahên gumřay bê wicûd
yehûd ’erziş kerd we bê çûn û çend
be lat û ’uzza mederût sewgend
ḧezret wat er min řam bigno lêşan
der sa’et řûy wêm megêłnûn cêşan
yehûd wat to ḧeq we canb darî
me’lûm xuđay wêt we çem međarî
cew dima watiş we ḧeq sewgenden
îne her ew şexis se’adet menden
xuđa ce tewrat êsim ew berden
wesfiş pey musa bin ’êmran kerden
ẍerez, neqid û cins yekser berdişan
mayey mêsir gişt xerîd kerdişan
meqsûd yaran temam bî ḧasił
kerdin mamełe we «ḧisb alxiwa»y dił
şerit têcaret mebo bew tewr bo
nef’iş çûn řêjin řêzay new hewr bo
barxane bar bî we şadî û xuřřem
řû nyan ne řay mekkey mu’ezzem
menził be menził tey kerdin řahan
êlzam û êtmam zumrey gumřahan
meysere dya dû murẍ erzeq
pey çetirdarî midran mu’ewweq
her yekê çetrê şîrîn aławe
ce fewq ḧezret gêrtin baławe
her be endazey řefit naqey ew
mewyaran der dem we dewan dew
nimazan zeřřê şu’ley aftab
bigno we gerden şay gerdûn řikab
ce no hem ḧezret şay gerden bê gerd
we mekkey şerîf murace’et kerd
wextê daxił bî çûn necim gerdûn
xedîcey kubra çenî çend xatûn
her muşahêdey murẍan mekerdin
dûra dûr sucdey ḧezret meberdin
xatûnan cey řemz yekser ḧałî kerd
te’rîf ḧezret we myan awerd
naga meysere ama ce lawe
ser firûd awerd midra be pawe
xedîce persa eḧwał ḧezret
ce murẍan fewq şay şîrîn şewket
meysere ’erz kerd şexsê kerîmen
bizan muḧemmed şe’inş ’ezîmen
her ce pay naqe ta qisey nestûr
cumley mu’cêzat nezdîk ta we dûr
beḧis yehûd û nefi’ ew sefer
yeka yek ’erz kerd ce lay ew diłber
xedîcey kubra be kesret mał
be awaz ḧusin şîrînî cemał
zumrey senadîd qureyş û ’ereb
tełebkarş bîn we şadî û tereb
multefêt nebî be îzwac kes
mayl nebî hîç be mezac kes
ce meyl ḧezret derûnş keyl kerd
ce fêraq ew dîdeş peř seyl kerd
yek ’ewretê bê nefîse namê
cemîley merbût şîrîn kelamê
’efîfey ’aqił saḧêb kemał bê
ḧekîm zaman ḧał zan ḧał bê
xedîce penaş bew ze’îfe berd
êzhar «ma fî zimîrArabic» wêş kerd
nefîse we zat xuđa sewgend werd
pey mwasłet ḧezret ’ehdiş kerd
ta şî we xidmet şay betḧa yane
’erz ḧezret kerd be meḧremane
watiş xedîce be to meftûnen
ce fêraq to cergiş peř hûnen
bał merḧemet bikêşeş we ser
ênkaḧiş biker we meyl dawer
qewm qureyş gişt tełeb karşen
ehil senadîd gişt daẍdarşen
kes we cifit wêş qabil nezanan
zîy beşer be wêş meḧrem newanan
çûnke wêş paken ew nemam no
pak meyliş her ha ce lay pakî to
ḧezret fermawa er ḧeq řezaş bo
řezam we qeder her çê qezaş bo
nefîse zana ḧezret řazîyen
řaẍêb we tezwîc fitway qazîyen
da we xedîce mujde û beşaret
xedîce xerman xem da we ẍaret
qerar da sa’et mes’ûd ew řo
pey bestey ’eqid şay firîşte xo
çûn baboş zûter fewtiş kerde bê
’êsmet penah be pişt perde bê
yek ’emûyê daşt, yek ’emû zađe
her dû ’ulemay ew wext û wađe
’emir bin esed nam ’emûş bê
canşîn cay mułk babûş bê
hem ’emû zađeş wereq bin nofeł
şecî’ meydan serdar serteł
her dû tełeb kerd pey tezwîc wêş
be qanûn qewm bizurgan pêş
cew teref ḧezret şay e’la sêfat
«xitim almirsilînArabic» xwacey ka’ênat
ebûtalbiş ḧałî kerd ce kar
hem e’mam wêş gişt kerd xeberdar
perê kar xeyr meşweret kerdin
teşrîf we menził xedîce berdin
yek nefer ’alim ce ’êlim dara
qazî ew eyyam qewm nisara
ew hem we meclês kerdişan êḧzar
çenî çend bizurg danay řozgar
şîrînî şerbet ḧazir kerdişan
be mubarekî ḧezret werdişan
ta ebûtalêb yek xutbe wana
watiş xuđawend ’elîm û dana
byen şew û řo fesił û mah û sał
ḧemd û sena pey zat bê zewał
êmeş we ewlad êbrahîm sirişt
her take adem yek yek pişt ew pişt
fezłiman ce ser mexloq gişt byen
îne me’lûmen xîlafiş nyen
ke’beş we ewlad menaf siperden
zemzem we haşim erzanî kerden
«’ibdalimtilb» me’lûmen lêtan
yekser xo dîtan we dîdey wêtan
bendeyç xo e’yan qewmim mezanan
daym we ře’îs ḧukmim mewanan
axir muḧemmed birader zadem
şay zîba tel’et xuđawend dadem
berguzîdey zat danay daweren
ce melaykan şerefnak teren
bikêşaş çenî qureyş seraser
êđ řaciḧ meyo we danay dawer
xedîceş mebo tełebkarşen
be dîđe û be dił xerîdarşen
bîst wiştir mêhir û «ḧiq alisdaqArabic»ş
ta tebdîl nebo bezim mezaqiş
wereqe bin nofił xutbey wêş wana
watiş xuđawend ḧeqen tewana
be’d ḧemd zat padşay barî
we dîn ḧenîf ’eqdiş kerd carî
’emir bin esed wat be ḧełałî
hem be ham ciftî be xoş êqbałî
xedîcey xweylêd be emir ełła
dam be muḧemmed «abin ’ibdalilhArabic»
yekê perwane yekê wêney şem
perê ẍeraban herdû çenî hem
sa çûn xedîce xoşḧał bî we dił
muradiş ce lay xuđa bî ḧasił
ferma kenîzan ta daşan ne def
sirûd watşan yekser bê texef
bełê her ew řo zuhrey pak endêş
çenî muşterî xwerşîd sîmay wêş
ne xełwet xaney yatax deycûr
mewsûł bîn ta wext sifîdî kafûr