xibir dadin fut şîrîn bih şîru û şîru him xud ra az ẍisih hilak nimudin
From the Book:
Şîrîn û Xusrew
By:
Khana Qubadi (1704-1778)
9 minutes
309 views
bişnew ce yaran kenîzan řend
mendew muntezîr çenî esp û bend
herçend kerdin sebir be şîn û şeyda
dîn şewq şîrîn hîç nyen peyda
dîşan biřya deng zayełe û zarîş
namaşan ne goş zîřey zigarîş
yaran be yekca řwała be dew
řijyan ne gumez mezar xusrew
dîn şîrîn keften mat û sernîgûn
ełwełay hûnen ce ser ta xûn
minało, meyo hûnş be dewda
piştanen we bejin xak xusrewda
xałanş ce hûn kerden be zuxał
mwaçî řoḧiş siperden sed sał
herçend çiřîn lêş kemend dirazan
nebîş ḧał û hoş, nama be řazan
dîşan mewc hûn ne çał tînîş
midran muyeran nebend bînîş
deşney taze saw ẍerqen ne cergiş
xuroşan meyo ne bałay bergiş
řoḧiş perwazen, wefatiş kerden
mwatit şîrîn sed sałen merden
yaran be yekbar be dad û bêdad
kêşan bang berz fuẍan û feryad
zîřnan be zar zayełey zarî
xuroş û ẍewẍay berz dyarî
yeksan xelayq řwałan be dew
řijyan ne gumez mezar xusrew
aman dîn şîrîn keften sernîgûn
sertapa ełwan ẍełtanen ne hûn
yekê ser be gił, yekê xak beser
řestaxêz xêza çun řoj meḧşer
xêza zelalet zarîy şor şîn
yawa be şêro eḧwał şîrîn
řwałan be řem yaran dił řêş
ḧałat şîrîn watşan perêş
şêro şineftin çun bey tewr eḧwał
tawya ce derd, bî be koy zuxał
řwała be řem be eşk û esrîn
be şîn û zarî yawa be şîrîn
dîş şîrîn ne xak xum sernîgûnen
sertapa temam ẍełtan hûnen
be çing naxûn wêş sed pare kerd
nirkinaw nała, kêşa ah serd
awerd be daman yexeş ta kemer
wêş nya ne gił ce pa ta beser
be zarî û zigar, be soz esrîn
fuẍan û feryad amaş be balîn
be eşk hûnîn dîdey dił be coş
ferq şîrînş nya ne aẍoş
deşney têẍ têz kêşa ne cergiş
dya be ełwan hûnîn bergiş
zułfiş miłeman, masyan ne hûn
kasey çemanş piř byen ce hûn
mujgan û ebroş saçax çîn çîn
byen be peykan xedeng hûnîn
leban lałş mewc mirwarî
byen be ẍebẍeb peřey gułnarî
zinc û zenexdan ce hûn xuşkîn
řeq byen ne řûş zułfan muşkîn
saq û suraḧîy sîney sipî lał
byen ẍerq xûn çenî zułf û xał
qubbey qendîlan weşboy şemameş
midrewşa ce hûn ne beyn cameş
şêro be şîwen herçend lawnaş
zarî kerd bew tewr tewen tawnaş
çiřîş be şîrîn be zarîy řewan
şîrîn be şêro nama be zwan
herçend mibosa cemîn camanş
dem minya ne cay kone zamanş
bo minya we boy zam noşewe
herdem minyera bo we boşewe
bosa be zarî des û damanş
be leb milêsa zûx zamanş
herçend kerd şîrîn nama be řazan
xeftebê ce xew ser nêş gazan
zanaş be taqî mewtiş ne mergen
ser nêş mewday deşneş ne cergen
nezim nemenden ne coş dêrîn
şêro qerarş biřya pey şîrîn
des şîrîn girt be şîn û zarî
be bang bê şerim, feryad û zarî
watiş: ey şîrîn şay newnîhałan
kerdîm be hûnîy şay kemer lałan
řîswa bîm ce yam perê řozgar
kerdim qetił bab, bîm be zînakar
text xusrewm çon da be tałan
kerdîm be serjan wat wat sałan
sîlsîle û saman kerdim sernîgûn
xusrew be xencer ẍełtan bî ce hûn
mîrat xusrew herçî mend perêm
dam be aweda min be dest wêm
baboy wêm be têẍ kerdim sernîgûn
supa û serdaran kerdim tûn be tûn
şîrîn herçîm kerd to penem kerî
gunay ’eşqit bî ce řagem berdî
herçî to watî awerdim be ko
îne şerit min, ane beqay to
mîrat babom ce desim berşî
axir ’aqîbet îne pêm kerdî
hem keyxusrewm ẍełtan hûn bî
hem şîrîn şox ce destim berdî
hem supa û hem san, hem ser û hem mał
hem banû şîrîn, him şay kemer lał
namerdit keran beser neberdî
ye pey çêş bey tewr to penem kerdî
min bey derdewe îse çêş kerûn?!
dad diłey wêm welay kê berûn?!
sewday syaset be wêm nimanam
kê meyo be dad hawar û hanam
’îlacim êden wêm bidem bi kuşt
farîẍ bûn ce dewr dinyay zîb û zuşt
cewdima be soz zarî û zigarî
kêşa bang berz nałey dyarî
watiş: hey bêdad sera û sûm min!
axir aşfite, bê nucûm min!
syaset we ser, sya bext min!
cellad hûnîy tac û text min!
hawar bê hû ser û mał min!
ẍenîm xûn řêz kemer lał min!
xetay hûnî bar xeyał xam min
bê berî ce wesił cemîn cam min!
meḧrûm mehcûr dewr dûn min!
şêwyay şeytan şerit bê şûn min!
şûm şermendey şermesar min!
axir řûsyay sed hezar min!
alûdey ’ezab meynet bar min!
bend ciger řêş, nêş xar min!
pabest bendîy bend dam min!
řenceřo ce dîn dilaram min!
hey dewran dûn, dad ce dest to!
keyanîy şeş dang şêr mestim řo!
bêdadim ce dest maceray bê şo
pey şîrînim dad, pey xusrewm řo!
feryadim ce dest dewran bê po
pey lał poşim dad! pey lał bexşim řo!
fuẍanim ce dest dinyay řenceřo
pey kîsram bêdad! pey cam řêzim řo!
sa kerdim saman ser’encam no
şehryar şay key keyanim řo!
destim biřêzo, qetił gyanim bo!
serdar serkeş serḧedanim řo!
şeytan, hey şikom şertit nîgûn bo
weswas weyşûm tałet zebûn bo!
şêro, hey be zar biřêzo destit!
be têẍ ełmas bikeran qesdit!
gerdûn, hey çerixt negêło be şad!
badeban geşt keştît bo berbad!
dewran, hey dîdar dînit nemano!
şax derxtan şemał neşano!
dinya, hey demax dûnit dyar bo!
ber û bunyadit be tûn û tar bo!
cîhan, hey culûs coşt betał bo!
kaw kawanit be koy zuxał bo!
sema, hey meqam sayet xiraw bo!
sitaret sergum gêc gerdaw bo!
zemîn, hey meqam zêbat zebûn bo!
bazarit be tof tofan nîgûn bo!
xurşîd, hey gerdiş dinyat be keç bo!
buruc beyzat wêney tarec bo!
qemer, hey mehtab mahît be tûn bo!
birût buricit ẍerqab hûn bo!
neřřad, hey textey nerdit be ger bo!
nîşaney neqişt zêr û zeber bo!
çare, hey îqbał ’eqiłit zebûn bo!
tedbîr tałey tast nîgûn bo!
dîde, hey dîdar dînit zułmat bo!
bînayît ne mewt merg memat bo!
gułan, hey ẍunçey bergitan be qîr bo!
bad burdey bahîr bay zemherîr bo!
çemen, hey çinar çetirit çamer bo!
dewran, hey baxçe û baxt bêber bo!
qetar, hey şikof şadît berbad bo!
sergum ce yaran tîr seyyad bo!
seḧer, hey sewad subiḧit xeste bo!
şemał, hey şinoy bast beste bo!
şefeq, hey şefaf şewqit betar bo!
şewq şefafit her nadyar bo!
ce dimay xusrew dinya bo qehhar
dinya bo be gêc gol «zirêwar»!
şêro ce dimay şîrîn diłber
dinyaş bo zułmat, zêrş bo zeber!
hem tof tofan ce new dyar bo!
zelzeley ’ezîm çun ewweł car bo!
dimay kemer lał dinya bo berbad!
dewran şêro nenîşo be şad!
îse çêş kerûn min bey zamewe?!
wey nam bednam řîsway mamewe?!
her çendê kerdiş be eşk hûnîn
deng dełałet neşneft ne şîrîn
şêro dî şîrîn xarş ne cergen
zanaş be taqî ne mewt mergin
şêt û şeyda bî derdîn dara
řwała be řem řû kerd ne sara
bang û waweyla be dad û řořo
dêwane û medhoş řû nya ne ko
ne şon şêro xuroşa supa
tawdan tekawer qetredan be řa
kerdin cehd û cext herta ke tawan
ha dîn bî nedîn, peneş neyawan
yawa be cayê xar xeter řêş
îse qułung gay şêro maçan pêş
řûş nya ne kaw yas koy kemer
řwała we řem ta yawa we ser
hîmmet xwahî dûn dinyay zebûn kerd
ne taş tûşda wêş sernîgûn kerd
ey taş be ew taş, ey seng be ew seng
piřaş bî ne taş tûş ebłeq řeng
ser da be tawîn, ten da be tałan
hûnş çun qełwez řijya be hałan
pare pare bî ne řûy tûş taş
řêzan řêzeş bî be sed piřaş
her řêzey řêziş be nêş xarê
her tîkeş bend bî beser dyarê
supa û serdaran yawan be karş
dîşan nemenden esił asarş
her yek ne cayê hucûm berdişan
çend pos û pêşeş peyda kerdişan
nyan ne kîse, bestin be xwarî
horgirtin, berdin be şîn û zarî
be dad û bêdad be eşk û esrîn
awerdin welay tabût şîrîn
supa û sułtanan, xanan, ẍułaman
şah û şehryar bek û keyanan
zarî û şor û şîn, fuẍan û feryad
yekê pey xusrew, kesê pey ferhad
kerdin şînşan be eşk û esrîn
yekê pey şêro, yekê pey şîrîn
dimay şor û şîn be zarî û zerûr
daşan ẍesłew ẍesił be muşk û kafûr
be aw zemzem şust û şo be ten
top sifîd ketan kerdin pey kefen
herdu ham qîran ce mekan new
nyan ne pałûy mezar xusrew
furzend û babo û ḧerem çenî hem
tekyedan be seng syay tar û tem
yaran be zarî, be dîdey nimnak
serdaran be hem siperdin be xak
dewran bê po karş dû řengen
axir cay giştiman ew maway tengen