şinîdin awaz şîrîn xisru ra
From the Book:
Şîrîn û Xusrew
By:
Khana Qubadi (1704-1778)
6 minutes
225 views
sa ke şehenşay bezim bo ’ebîrîn
şineftiş bey tewr feryad şîrîn
herçend ke nedî ew şêwe û řengiş
bełê dersa’et şinasa dengiş
fermaş ta ce bezim xergey bo ’enber
nameḧreman gişt berkewan weber
şa wat be şapûr: nemenden hoşim
çiman ama deng şîrîn ne goşim
’erz kerd wat: bełê deng şîrînen
merhem numay zam diłey xemînen
şa fermaş şîrîn řiştey îlahî
awerden teşrîf be xergey şahî
wêney ’eyyaran ew perwîn paye
kefit ne xakpay xusrew çun saye
sa wextê şa dîş ew nadîrey dewr
kefit ne xakpaş çun şîrîn bey tewr
ce şadîy ew şox şîrey şekerbar
yawaş be ferqed ferq îftîxar
ce subuk řoḧî û burdebarîy ew
zyater ce ḧed memnûn bî xusrew
çun şîrîn bey tewr bî be hamřaziş
kêşa be sed dił firawan naziş
şa kerd ce dimay ew diłnewazî
teqazay bazî, maç û destibazî
cenab ’ulyay kiłaf sosenî
şabaz şeş dang şox ermenî
pê nebî řazî, řû awerd behem
piř kerd ce esrîn cwî beḧrîn çem
’eceb mend xusrew cew dîdey sêweng
ewweł car şad bî, axir xatir teng
’erz kerd be xusrew nîhanî şapûr
watiş: çun şem’ şox şa destûr
hîçkes ne baxiş nober nekerden
çun guł ne gułzar ’îsmet perwerden
meḧremê çun bad bo muşk seḧer
ne ḧełqey zułfiş nekerden guzer
îse ew diłpak cun ḧorîy beheşt
ce diraz destîy şa miterso sext
pey çêş? ta îste çun şaswaran
be ’erz û sîret dinyaş wiyaran
şa çun pê zanaş şîrîn bê nîkaḧ
saḧêb ’îsmeten, nimebo sełaḧ
xusrew be sewgend ’ehd û wefa best
be mîwey baxiş nimekêşûn dest
ta cem nekerûn şahan be î’zar
nawerûş be ’eqid wîm be ’îziz û naz
bełê çenî hem îmşew ta be řo
binoşîm şerab şîşey ’enber bo
pey çêş? ey dinya herçend řengînen
fa’îdeş nyen, merg ne kemînen
yek şew dinya buyarmê be şad
ne key mimano sub, ne keyqubad
ey ’ehde şineft ce şa çun şîrîn
piř tebessum kerd ẍunçey ’ebîrîn
des berd pey çarşew hordada ce ser
derxişan çun qurs dû heftey qemer
ne ferq qulley muşkîn ce serda
werda çun ejder we řûy kemerda
ne pay ew qulley muşkîn bêz ew
midrewşa ḧusinş wêney şem’ şew
nexiş wenewşeş ne řûy yasemen
mibexşa boy muşk mudbîrey xuten
şehenşa sa dîş şîrîn bew řendî
bew şêwe şîrîn, bew diłpisendî
ce neş’ey meygûn lebanş çun mest
beser ẍełtya, camş kefit ne dest
xêzna şoxîş bew tewr řestixêz
kefit ce îxtîlat xusrew perwêz
wextê mikerdiş be xoş endazî
mu’enber zułfiş we pêda bazî
herkesê midî mikerd temaşa
’eqił û sebir û hoş lêş mikerd ḧaşa
axir cun xusrew bê ceng û dewa
çun zuhrew we burc muşterî yawa
xêza çenî ew řiştey subḧanî
şurû’ kerd ew şew be mîhrebanî
hoşiş pê nemend, ce şewqiş bî mest
ga mibosaş pa, ga mibosaş dest
ga ’enber ce çîn zułfiş mimała
ga lîmoş migest, ga lêş milała
ga destey nergis mida be destiş
ga surme minya ce dîdey mestiş
ga mawerd weber ce des bazwaneş
ga mibosa xał pay lûtewaneş
ga minyaş kiławzeř ne kelley ser
ga xirxał nepaş ber mawerd weber
ga migirt we des şemameyî lîmoş
ga ga mikerd waz yexey ’enberboş
ga zułfiş ce lûl xaw mikerdewe
ga taftey qirimz lêş midřidewe
ga mawerd ne wer şem pey temaşaş
ga mikerd zerîf seyr ce ser ta paş
ew şew ew xusrew ew şay deryakêş
bey tewr keftebê gilarawî pêş
mikerdiş xeyał serasîme tewr
herdem mwatiş ew nadîrey dewr
yanê be şîrîn cemîn guł bêz bo
ye ew dilaram saway newxêz bo
îd mwat must ne gerdûn gêsûş
dem minya ne dem, bo minya ne boş
mwatiş: şîrîn şox şekerřîz
ye tonî fîday bałat bo perwêz
axir ew dû şox ałay şox û şeng
şeqey maçşan mişî be ferseng
emma ke şîrîn řagey ḧeqşinas
pas duř mikerd ce mewday ełmas
herçend ke xusrew lêş lałe mikerd
şîrîn ce laley ew bazî newerd
ew şew ta be sub her mijendin saz
xusrew milała şîrîn mikerd naz
sa bey tewr hefit řo şîrîn û xusrew
kerdin be hem ’eyş her řoj û her şew
bê perwa ce derd ey dinyay badî
wiyardişan ’umir şîrîn be şadî
ce dimay hefit řo şay dara neberd
ama îradey murace’et kerd
fermaş kejawe ce çoy sendel saf
amûdey gewher, naw perdey zeřbaf
kerdişan weş bo be muşk û ’enber
pey ew guł řuxsar şox leb şeker
xerama şîrîn çun may dû hefte
şî ne kejawe çun guł şikufte
çun mah mikerdin çoge ḧîsabiş
supa çun kewkeb kefit ne řîkabiş
cewdima xusrew daray lał kemer
wêney ciłewdar keftebêş ne wer
xasey ẍułaman semen boy sade
hemřahiş çenî çend kes şehzade
çun řîkab şatir çenî kejawe
pyade bî esp mişîn be řawe
ta çendî bey tewr şehenşay cem kêş
yawa be mişkoy muşkîn ’etir wêş
diłşad be şîrîn nîşt weban text
muneccîm başî tełeb kerd be cext
ta kero ḧîsab perê tedarek
kamîn řo neḧsen, kamîn mubarek
şayed ke ew şox şîrîn ẍemze û naz
baweroş we zebit wesiłş be î’zaz
muneccîm be ḧukim zîc û usturlab
pey se’d û neḧsiş sa’et kerd ḧîsab
wat: çun şehenşa fire be sozen
řoy ferda subḧiş temam feyrozen