tidbîr kirdin xisru bih cihit firhad û firistadin bih pî aw
From the Book:
Şîrîn û Xusrew
By:
Khana Qubadi (1704-1778)
5 minutes
234 views
nîgarindey neqiş şîrîn ermen
ce şûmeyî dewran koy xem be xermen
bey destûr kerd neqiş be dewan dew
dêbaçey destan ferhad û xusrew
be xełwet şewê şehenşay cem kêş
tełeb kerd be’zê ham deman wêş
’aşiqîy ferhad xatir perêşan
seraser temam îzhar kerd lêşan
axir bey sûret ew cemşîd efser
ce durc dehan řêzna guher
wat ce ḧîkayet ferhad seng bo
nîşten ne cergim sed hezar neşter
ce ḧed îqlîm ewend nedaran
be carê ce ḧed wêş pa winaran
çun bê edebîş ce ḧed wiyerden
tedbîrş çêşen, mibo çêş kerden
ew bar yaftegan bezim beheşt bêz
berdişan sucdey xakpay perwêz
watin hey xusrew cem cay cîhandar
şaystey ewreng zêbay zeř nîgar
saḧêb kemałan kemîn melay ton
sucdegaşan xak bo muşk pay ton
zîlil ełłahî beser sayet bo
bułenditer ce text perwîn payet bo
tedbêr her êden werce sizay sext
bawermêş we pay xusrewanî text
ew aşfitey şûm herzey eble řenc
bikermê řazî ewweł her be ginc
pey çêş? pey herkes ser’î û bed ḧałen
dařûy mufeřřîḧ ew genc û małen
er be genc û mał ew şêt sermest
ce şîrîn horgirt be şîrînî dest
werne ne dewran dinya be řengê
mibo bikermêş meşẍûł be sengê
her ta ke zînden ew şêt dił teng
serf kero ’umirş be kar ew seng
xusrew der sa’et ferma wêney bad
her ko hen be cext baweran ferhad
dana meḧreman yaran serheng
horêzan derlad çun ahîr be seng
watşan be çend kar azmûde
be pay danay cîhan peymûde
be qapî dewłet padşay qabił
bikeran ḧazir ferhad bê dił
herkes baweroş, şay dara endaz
be cełd û în’am mikeroş mumtaz
ew řo ta perdey zułmetda dyar
beyzey qurs zerd xurşîd ne pêwar
be her terefda be sîr’et çun bad
çerx werdin ne şon napeyday ferham
herçend kerdişan ew şeyday sermest
firê custuco hîç nekefit we dest
çun řayat şew ce řo bî meknûs
řengîn bî ce nûr cîhan çun ’urûs
zemîn ce zeřbefit xor bî piř zêwer
fełek muḧtac bî be zeřřîn efser
yekê ce yaran firustadey şah
dîş wêney řustem şexsê ce nagah
be feřiř û şewket wêney fereydûn
be zor çengał ce zeyẍem efzûn
şî, be edeb kerd çoge selamş
persaş be danş danay namş
watiş min ferhad xestey řencûrim
aşfitey şîrîn cemîn piř nûrim
çun şeyday ew şox zułf ’ebîrînim
be tał muyero ’umir şîrînim
ew firustadey şay feřřux nejad
ce řay meḧebbet watiş be ferhad
mer hey şehenşay şêx sen’an meşq
qîbley ’aşiqan, tekyedar ’eşq
be wesił şîrîn bikero şadit
çun cewanmerdan bido miradit
ferhad daş cewab ce soz derûn
wat ey xîredmend me’rîfet efzûn
şehenşa pey min key bey endêşen
ewîç sergerdan ce sewday wêşen
herçend ke serşêt, byaban gêłim
çun weḧşî çenî weḧşyan wêłim
min xas mizanûn cey zêd û weten
maceray xusrew şîrîn ermen
çun gogird ahîr menyer pêmewe
bazem be siftey dax wêmewe
aro min ke cin dêw lêm migurêzo
ce henasem dûd dozex mixêzo
pey şêwey şoxî şîrînê xestem
pose mwînî bê hał û cestem
sa xusrew ke şay feřřux tebaren
ce şexşê çun min lêweş çi karen
baz hem ew qasîd dem çerb çalak
watiş sewgendim be yezdan pak
min aro bey tewr be dewan dew
bê diro û xîlaf kyasten xusrew
ey suxen be goş ferhad çun yawa
çun ẍunçey newxêz ce zewq şikawa
çenî ew qasîd xuddarî nekerd
be bargey řefî’ xusrew qedem berd
gird awerî bîn mexlûq ne dewirş
ḧeyran bîn ce şikił terkîb û tewirş
ce samş mexlûq gişt sersam mendin
gişt şanamey mediḧ bizurgîş wendin
umeray ’îzam, wizeray e’zem
axir ’erz kerdin bew şay mukeřřem
ferhad mîskîn meynetî bexten
îradet çêşen, ḧazir ne wexten
fermaş be î’zaz mumtaziş kerdin
be payey serîr xusrewîş berdin
xusrew nîga kerd zanaş dilêren
be şewket çun şa, be heybet şêren
bełê ce ḧesret gêłan ce dîdar
çun mest meykeş hîç nyen huşyar
peydan ce hûnaw dîdey esrîn bar
gonaş řengînen çun laley wehar
ce îstîẍnay ’eşq ce meh ta mahî
nimamaş we çem «xisusaًArabic» şahî
cewdima be emir şay keyxusrew xû
heçend perêş genc gewher kerdin ko
îltîfat nekerd, nekerd temaşa
be ẍeyr ce şirîn ce gişt kerd ḧaşa