misliḧit kirdin xisru bih mirîm dixtir qîsir dir xisus xwastigarî şîrîn
From the Book:
Şîrîn û Xusrew
By:
Khana Qubadi (1704-1778)
6 minutes
468 views
xamey piř î’caz şox ’îsa dem
ce bab xusrew giftugoy miryem
çun tûtîy natîq suxen şerbet bêz
bey tewr bî mest mest şox şeker řêz
şewê çun be duř pîrozey mawî
mêx řêz kirya zuhrey semawî
şikefit ne řûy baẍ çenî çend hezar
şikofey ebyez çun ẍunçey wehar
xusrew ce meclîs şî be mişkoy wêş
ce daẍ şîrîn firawan dił řîş
be cend îltîmas ew şay ’îsa dem
derxiwast kerd perê şîrîn ce meryem
watiş sipî sewł řiştey îlahî
nergis boy newxêz, guł baẍçey şahî
çun ce song min şîrîn ermen
bê şertî nekerd, bî celay weten
ce lay bizurgan kêşa bednamî
duşmen awerdin pêş şadkamî
terk tac û text padşahî kerd
ce xusrewî wêş perê min weyerd
ce řesim û adab bizurgî dûren
kesê be îxlas yend toş menzûren
demê cend nebî to be hamřaziş
ẍemxiwarîş nekey, nekêşî naziş
îstîd’a êden sewł bo ’enber
miderût sewgend be tac qeyser
ce řay merḧemet şîrîn binwazî
çun şîr û şeker çenîş bisazî
sewgendim be ’edił newşîrwan pêş
be erway hurimz şay sikender kêş
er bê řezay to bikêşûn naziş
ya bibûn şewê min be hamřaziş
eger bikerûn temaşaş yek řo
to nedey řuxset be bê emir to
ne herdû dîdem meyl serd kêşan
çun tay zułifit bû xatir perêşan
meryem êd şineft ce lefiz xusrew
řoy řoşin derlad lêş gêła be şew
wist ne pêşanî be ẍezeb şikenc
pêç werd wêney mar xila ne řûy genc
ce xof şîrîn şahzadey ermen
kerd be lalezar ce nergis semen
wat erê xusrew şay dara řîkab
lał bexiş lał poş nadîrey nayab
ta ke çendê çetir gerdûn we pa bo
xurşîd bextit şu’le nima bo
me’lûmen ce lay kaffey xas û ’am
beter ce ḧenzel sozendey bednam
to be bî şîrîn dinya lêt tałen
bazař şadî û ’eyşit betałen
kesê çun şîrîn zułf ’ebîrîn
er bignoş ne dem ḧełway şîrînî
derdit le gyanim wêt ber be qazî
ew be sirkey tirş key mibo řazî
řastiş her êden şay feřřux exter
sê car sewgendim be tac qeyser
er çenî şîrîn şox mey noşim
çun şîr û şeker biderî coşim
mikêş derdiser şay dara şyem
pûçen îmtîzac ême û to be hem
şîrîn muḧîllen sed kes řêxten hûn
kemter şagirdiş sosen cadûn
herçend şîrîn şekerîn řazen
maçan ’eyaran hem ḧuqqe bazen
wextê řezaşen bwano efsûn
mawero be war xurşîd ne gerdûn
be wêm mizanûn şehenşay ’adił
xusrew lal poş ce şahan kamił
şîrîn şîrînen be şîrîn řazî
be her new’êwen miderot bazî
firê xofen ce fî’il ew şûm
min ce wesił to bikero meḧrûm
min ey ’îlmeme firawan wenden
sermeşqim cey bab ce ustad senden
ekser ce zenan şûm cadûkar
maweran be mekir ’etarîd be war
er sed zen şoxen, ’enberîn baren
bê şerit û şonen, bê î’tîbaren
dana bizurgan piř hoş qabił
key miban ce mekir zen hergîz ẍafił
çend hezar merdan kar azmûde
be pay danayî cîhan peymûde
herçend kerdin sa’î ce dinyay derbest
mer zenê bê mekir mignoş ne dest
yekê be bê mekir bê ḧîlh û sitem
her nekefit we dest, nedîşan be çem
sa şîrîn yekê hem cew yaranen
cew pol piř mekir cadûkaranen
çun şołey xurşîd řewşen byen lêm
ce ham nişînîş bed meyo ne řêm
erê fîdat bam şay sureyya bext
newerdit ḧey wer sed sewgend sext
er çun nesîmî mikenan posim
herta zîndenan her tonî dosim
îse ye çêşen şay humayûn bext
zînet bexiş mułk padşay û text
çenî min kemen deng û dewranit
daym şîrînen wîriř zubanit
çun şa çenî min sewgendê werdiş
berşî be xîlaf ew ser neberdiş
mûde’aş êden pey dił newazî
bey ḧuqqe bazî biderom bazî
xusrew ye şerit bo mo îmşew carê
bikerî tenaf pay tenya darê
wêm kerû xełas cey gişt azare
cey gişt der ser, cey gişt pejare
ta to be tenya bê şerit û bunyad
binîşî çenî şîrînit be şad
er mibot xusrew min be dest wêm
nekerûn ce dax şîrîn qesd wêm
ba ca sakin bo new qesir wêda
şayç be řawyar newyero pêda
xusrew dîş miryem bey tewr ne cengen
pey ham nişînî şîrîn be tengen
yeqîn ḧasił kird hergîz ne řwî dewr
nimayan be hem gurg û şêr û bewr
ce lay ew řomîy estemûł weten
kota kerd ḧacet şîrîn ermen
be çermî û nermî dîsan daş bazî
xatir şadiş kerd be dił newazî
be ḧełway şîrîn, be şîrey efsûn
tałtîy şîrîn berkerd ne derûn
emma şîrînîş her řo be zerûr
we piłî text şa mikyana şapûr
mawerdiş peyẍam ew be nîhanî
pey şîrîn ce lay ew şay keyanî
hem be nîhanî şapûr ham derd
cewab şîrîn pey xusrew miberd
şîrîn şem şewq şay ferxunde bext
’eceb mendebê cey bazîçey sext
mwatiş be wêş mikerd xeyałan
ye çonen xusrew şay kemer lałan
bew gişt sozewe keften be hałê
perê xatran kone qiřtałê
çe çun min şoḧê, şêwe şîrînê
nuxtey xał bo mişk, zułf ’enberînê
bê guna û teqsîr îse ye řasten
pose pêş aman bêzarî wasten
bełê nezanaş ce diłda xusrew
bê wefa nyen hergîz çenî ew
er hen, her sełaḧ şahîş menzûren
pey şahan sełaḧ dewłet destûren
çun qîser çenîş kerde bê xasî
metirsa cey bab lêş bibo ’asî