nişsitin şîrîn bir tixt şahî û riftin bih mida’in bi’d az yik sal
From the Book:
Şîrîn û Xusrew
By:
Khana Qubadi (1704-1778)
4 minutes
273 views
çun banû be mułk ’edem bî řahî
şîrîn nîşt be şad be text şahî
wîlayet me’mûr be ’edił û dad kerd
bendyan ce bend temam azad kerd
’ecezey mesakîn musełman ta gerû
ce feřir sayeş eymen bîn ce cewr
ce germîy aftaw ’edił û însafiş
ce berq şimşêr xara şikafiş
gurg û mêş ce ’edił ew cemîn çun şem
sîẍey îxwanî wendişan be hem
be şahîş merdum bew tewr bîn xursend
be ’edił û dadiş mwerdin sewgend
seng diłey sext załman şûm
nerim bî ce qurs usturlab mom
zera’et ce nûr ew zułf bo ’enber
yek be sed mikerd, bełke zyater
aferîn şîrîn, ’edił û dad şîrîn
serkêş řendan zułf bo ’ebîrîn
çenî sayew sam şahan pesendit
řewyey bizurgî û etwar řendit
belê ce «xanaPen name»y ’etarîd xame
munşîy wesif zułf ’enber şemame
be sem’ şerîf binşew ḧîkayet
er qesdiş xêzen walîy wîlayet
be cay guł zemîn mawero gewher
seng mibo be lał, xakiş be ’enber
er walî bê ’edił, şeraret pîşen
bed cîns, bedkar, dûr ce endêşen
wiłgey memleket key me’mûr mibo
eymenî û řaḧet ce xełq dûr mibo
«alqisihArabic» şîrîn be wesif şahî
be elqab wesif ḧîşmet penahî
ce dûrî xusrew giran bî derdiş
muyerd ce gerdûn henasey serdiş
moza çun şem’ daym ce ’eşqiş
her sewday xeyał ew bî sermeşqiş
ce nergis ew şox bała zeř sitûn
mikerd textey text şahîy wêş gułgun
zewq tac û text meḧfûz yaqût
ce dax xusrew lêş bî jeqnemût
axir ke şexsê awerdiş xeber
perwêz lał poş pakîze gewher
be dest qeyser şahenşay cem kêş
baz nîşten we text padşahîy wêş
meryem ke îcaz ’îsa mibêzo
şeker ce řêzey řaziş miřêzo
ew şay cem nigîn çun daney gewher
awerden be ’eqid ew dara efser
meryem perê wêş ew keyxusrew bext
be ’îsa meryem dan sewgend sext
ne ’ersey dewran ta zînden xusrew
berneşo ce emir humayûn ew
şîrîn îd şineft derûnş êşa
bê demaxîy sext ce xusrew kêşa
cey base nemend zeřřê taqet pêş
aşfiteter bî ew ce zułf wêş
bełê la’îlac ew ce dax û derd
ya yek sał temam padşahî kerd
ce dimay yek sał tuẍyan kerd derdiş
sewda çun dûy tund temako berdiş
eyr hîcran xusrew lał poş
meẍiz taqetiş hem awerd be coş
ewsa ke go send diłey kos kefteş
qirçey sextîy west ne cerg sifteş
çarş her êd bî be dewan dew
bişo we pay text xusrewîy xusrew
siperd be şexsê ew şay meynet kêş
genc û tac û text padşahîy wêş
xêza be cextê bała zeř sitûn
nîşt çun destey guł ne pişt gułgûn
şapûr neqşibend nadîrey nayab
horkêşa be cełd çun şatir corab
çenî çend kenîz tac û kemer zeř
swar bî be řexiş peřendey bê peř
şeker leb fermaş kerdiş supahî
çend genc û gewher esbab şahî
temam be gencûr serkar siperdiş
xeraman lwa be te’cîl berdiş
qetre da çend řo sewł bê endêş
ta yawa be qesir qedîm yagey wêş
şexsê çun nesîm be dewan dew
yawna be sem’ şerîf xusrew
şîrîn şem şewq zułf bo ’ebîrîn
qesir wêş kerdin hem ce nû şîrîn
ce şadî ferqiş be ferqida yawa
şikofey sosen şadîş şikawa
beła ew cem qedir ferxunde exter
ce xof meryem kinaçey qeyser
çunke ew dabêş cey werter sewgend
namerd neyaraş hîç bignoş newend
emma ce hîcran ew sîmîn ’uzra
be şew ta be řo pêc mida çun mar
nîhayet şîrîn şeker řaz řend
ga be peyẍamê mikerdiş xursend