ba him riftin xisru û şîrîn bih çugan bazî û şikar
From the Book:
Şîrîn û Xusrew
By:
Khana Qubadi (1704-1778)
4 minutes
368 views
gułçîn ey baẍ piř ’etir û sunbuł
bey destûr bestiş deste destey guł
ta badey ey bend weşboy ’ebîrîn
mehîn banû daş be xurd şîrîn
ḧusin sîmabîy sub ce şewq nûr
direxşa xaster ce şem’ koy tûr
gêła be qudret zat îlahî
řeng tîrey şeb be şem’ kahî
şîrîn sem şewq bêdar bî ce xaw
seyqel da řuxsar çun qurs aftaw
ce zeřbefit çîn ce dinyay fereng
poşa bey destûr řext řengawřeng
ejdehay gêsu be doşda kerd pexiş
best ne qed terkeş gułdoz piř nexiş
şox û şîrînter ce turkan çîn
kerd ne bazû qews piř şax řengîn
pêka ne pay zinc tomar gułzer
dû zułfey yaqût peř tawis peř
dû tuřřey bo mîşk awerd ce serda
werda çun ejder we řûy kemerda
best ne qed şimşêr cun şahan pêş
buřřanter ce têẍ sox ebroy wêş
destimałê zeřbafit taftey ermenî
guł qirimz, bûm zerd serguł sosenî
daş be naz «beser» kołaçey simor
xêza be sed lenc, be sed naz û tor
şoxter ce tersay şox ferengî
swar bî nya pa ne ewzengî
çun řostem ne pay badpay řexşewe
ḧerbey xusrewî girt be desşewe
cewdima seday zumrey çaweşan
wiyerd ne saray koh kehkeşan
ew sêsed kenîz piř sam sengî
heryek wêney şêr diřundey cengî
gişt be esp xas piř xiroşewe
çun tûs newzeř ney be doşewe
çenî şîrîn şîn be dewan dew
ta seraperdey perwêz xusrew
xusrew dîş şîrîn bew şox û řendî
çenî aw yaran bew diłpesendîy
meḧfûz bî ce bext feřřux exterş
kerdiş zeř weşan wêş û leşkirş
dest şîrîn girt nişanaş be text
xêza hem xusrew be dew poşa řext
wêney eskender swar bî we řexiş
kakoł mîşkîn we pêłda kerd pexiş
çenî supa û san şîrîn çun aftaw
goy zeřřîn wistin ne meydan daw
ẍafił bî xusrew cew nazk nazan
cew supay şîrîn şay şeker řazan
be çewgan bazî miberdin we ber
goy merdî ne çerx çewaşey çemer
xusrew lał poş danay demax berz
bewr behmen sa tûs newzeř terz
ḧeyran mend be tûł bejin bałaşan
be cewgan bazîy şox ałaşan
be řan û řekêf ři’nay řendişan
be dest û te’zeym dił pesendişan
cew meydanda de sa’et fêşter
daşan dew semend bad pay piř huner
çun be swarî şîrîn şebdêz
şox bî û şîrînter xeylê ce perwêz
herçend mikerdiş ew dara efser
go ce meydanş nimeberd we ber
şîrîn û xusrew ce ’ersey meydan
şewdêz û gułgûn çendê dan cewlan
axir cew meydan be ’ezim şikar
ew supay řengîn ře’nay şekerbar
berdişan hucûm ne ḧersey sara
şikar efgenan xaster ce dara
be mewday senan xedeng piř zor
wistin be yekda çen ahû û çend gor
ce sim řexşan jar poła sim
kerdişan řûy çerx ne gerdeda gum
xusrew ’eceb mend ce ney bazîşan
ce pêł û qełxan xoş endazîşan
ce şehab nexiş berq engêzşan
ce birîqqey têẍ ełmas bêzşan
şîrîn cew demda midra bê sermest
kemanê be çeng, xedengê be şest
xusrew ce samş temam bî sersam
pêş nemend zeřřê ’eqił û hoş û fam
kemend gêsûy şîrîn da gîrş
çun şêr zamar bî be nexçîrş
ta peř nîşt xedeng ẍemzeş ne cergiş
řeng best be zûxaw çun xezan bergiş
sa wextê tawis xor ce zaẍ şew
gurêza çun bad be dewan dew
mîşkîn kemendan zułfan ’ebîrîn
pyade bîn ne dewr seywan şîrîn
ce şadî û ce zewq ta we sub seḧer
noşaşan şerab gułřeng eḧmer
her wextê ke qurs xurşîd bê gerd
seng serkiwan poşa taftey zerd
şîrîn çenî ew nazk newhałan
sef bestin ne dewr şay kemer lałan
hem şirû’ kerdin be çewgan bazî
be hey hey şikar, be tîr’endazî
bełê herçend kerd xusrew dara
meger, ke şîrîn şay zînet ara
bidero firset yek direngê pêş
şayed ke maçê ew bistano lêş
neda pêş firset ew zułf ’ebîrîn
kerd be jiqnemût lêş ’eyş şîrîn