xurşîdî semay şîrîn cemałan
From the Book:
Dîwanî Mewlewî
By:
Mawlawi Tawagozi (1806-1882)
1 minutes
1436 views
xurşîdî semay şîrîn cemałan
řeşk efzay giroy dîde ẍezałan
daney şew çiraẍ xezaney hestî
mezey neş’ey ’eşq bade perestî
dergay medîney ḧusnî meḧbûbî
nûr efzay dîdey cergey ye’qûbî
xuda we toş dan bałay ’er’erî
her layq we ton şêwey diłberî
kałay şîrînî we bałat biřyan
tasî meḧbûbît ne ’ałem ziřyan
nîgay xumarît xembarim kerden
jarî marî derd we diłda berden
be wêney neçîr zaman awerdem
nêşî gulûley xembarî werdem
pelepel pey gyan ne des to berden
penam we penay fîraqit kerden
îse bê’aman xestey hîcranim
ser kerden hûnaw ne toy zamanim
ne sebirim çenî dûrît mesazo
ne wesiłit we meyl diłim newazo
ne yaray xeyał wesałî tomen
ne tabî dûrî xeyałî tomen
dił menden ne beyn xof û řicada
mezano řaş kam yawo ew lada
merto wekerem teşrîf bawerî
ya we lay wesiłit řaberîş kerî
wer ne, azîzim, qesem we namet
sergerdan mebo ta řoy qyamet