wełam
From the Book:
Karwanî Xeyal
By:
Hedi (1927-2016)
4 minutes
953 views
biray cinubî peyamekey to
geyşit û le diłim, hełsita boso
katê ke dîtim zor bê qerarî
ledes dujminte giryan û zarî
be agirî meylit kułî diłekem
sîs bowe dîsan gełay gułekem
çunke min xoşim ezanim dîlî
jêrdestî û kizî û matî û zelîlî
derdî girane xwênaw xwardine
gelêk lew wez’e xoştir mirdine
bot giryam biram nemkird xuddarî
firmêskî sûrim leçaw ebarî
řaste kake gyan, etoş her kurdî
etoş wek kurdan her şêrmerdî
le řabirduwekan toş yadgarî
toş řoley kurdan, hełoy şikarî
leřêy nîştiman xot ekey fîda
bo serbexoyî ser û mał wêkřa
bo řizgarbûnî zewî û xak û aw
wirde û yexsîrit enêyte pênaw
xo min ezanim pêwîste boman
takû etwanîn hewł deyn botan
etoş dezanî birayek le benda
biray dî nyetî gyan le bedenda
ême herdûk la řołey kurdanîn
xełkî kurdistan, şêrî jyanîn
le şîrî daykêk girtumane hêz
le awî şewî kirdûye parêz
herdûk la wek yek bo mirdin û jînîn
yek nefis û amanc yek dił yek dînîn
towî yek zewî gułî baxêkîn
cerg hełqirçawî şîşe û daxêkîn
perwerdey dawên ew daykemanîn
ke bo řizgarî ew sergerdanîn
eřjête beden le yek řeg xwênman
serçawe yek cê bo řê û şwênman
emin ger çaw bim, eto řûnakî
min mêşkî ser bim etom zanayî
le diłim dernaçê ah û nałeket
şikan be tîrî dujmin bałeket
zamêkit xiste cergî be êşim
nethêşt hoş û dił ne kem ne bêşim
şew xewm bote xeyałatî to
le dewrey îş û beserhatî to
řêbendan berda řêy hatuçoye
cêge řagwêzê lew herd û boye
befranbar ziryan legeł xoy berê
be cûte yare biçne seferê
ewcar řeşeme řinûy befrekan
mirwarîy sehoł leser berdekan
yaxo gomîlkey awî kwêstanê
ke bûne bendî bebay zistanê
be tîşkî tawê bitwênêtewe
dîsan beharêk binwênêtewe
xakelêwe bê be tepłî şadî
beřwêkî xendan lutfêkî zyadî
piř ka le lale dawênî seḧra
serxoş bê qumrî le geştî mezra
hełałe zerd ka dundî kêwekan
xo sewzepoş ken řêzî mêwekan
bulbul bo xunçe bibête çaweş
zewî xaş xaşk bigrête baweş
kewbař û kotir lebin řewezda
lejêr lutkekan kêwî berizda
qaqa bixiwênin bedem yarewe
’etrî guł bo ken le gułzarewe
be yarî xway berzî bê hawta
bo lay birakey gîraw le dawda
pêşmerge tîp tîp pyade û swarman
fermande û gewre û xawen karman
lawî şêrhełdiř, le mirdin bê bak
pîremêrdekan bo tekbîrî çak
pak nukî xencer jehrî mar pêwe
řadebrîn her yek ledûy yekêwe
şimşîr ḧemayeł welay çepmane
her çî çep biřwa bê şik bizane
estoy keç dekem be zebrî şimşêr
cergî kun dekem be peykanî tîr
dujmin lejêr ew pencaney meda
naçare tepłî eman lê deda
gełbaxî û bane û merîwanîyekan
swarey tîleko û hewramanîyekan
sincab û pawend řołe şêrekan
piłîngî aza bebir hełdêrekan
xoyan saz biken bo hawkarîy min
dujmin biław keyn wek towî herzin
tawê pelamar debeyne hêzyan
degrîn fermandey be qedir û řêzyan
carê sernêze ḧewałey cergyan
dayk dirust ka koteł le bergyan
ewan gełay dar ême bay ziryan
ziryan deřfênê gełay payîzan
řêwî řûbeřûy şêrî řiq hestaw
leser sîngyetî dû destî westaw
ałay serbestî le hemû laye
her kwê biłînd û berz û çyaye
heł dekem degirim cêjnî azadî
ba dujmin bimrê be bê miradî
serşêwawîyeket bibête cêjin
dujmin taławî merg biçêjin