newroz
From the Book:
Karwanî Xeyal
By:
Hedi (1927-2016)
3 minutes
1226 views
cêjnî kon û sałî tazey kurdewarî hatewe
hatewe agirî xebatî ew gele xoş katewe
hatewe cwantir le caran, cêjnî kawey qareman
şwênewarî mîdya, bapîregewrey kurdekan
hatewe bigrête baweş kurdewarî serleber
hatewe newroz û bo zistane îtir çareser
cêjnî newroze weten! wa katî pîrozbayîye
cêjnî law û kîjukałî toye, řojî şayîye
her hełałey zerde bonî dê le řêgey dûrewe
her çiłûkî dare zerdey dê be xunçey sûrewe
ew gułałe ał û sûre bulbulî serxoş deka
çepłeřêzanê le zistan û qelî řûřeş deka
ta şiney hêdîy beyan hat û henasey kirdewe
befrî lapał û tiropkî şaxekanî birdewe
zêwî awing bote milwankey milî gyabend û xaw
her tirûskey dê û delerzê, bay le ser bê ya hetaw
bergî zistanî le ber xoy dařnî ewřo zewî
nizim û berz û şîw û doł û řijd û hewraz û newî
ta le newrozda xełatî sałî taze wergirê
jengî damawî û hejarî û meynetî xoy laberê
perçemî şořş xełatî êmeye hênawye
perçemêk bo naḧezî ew xake çiqłî çawye
perçemêk ta to biłêy řengîn û berz û řêkupêk
perçemêkî wa ke qurbanî nebê şerme gelêk
çerim û darî kaweye destî siruşt gêřayewe
beyreqî parastinî ew xakeye her mawye
řengî sûrî bîrewerye bo şehîdanî weten
çawî hîwayan le hawřêyane taney lê deden
hewł û têkoşanî řabirdû webîr dênêtewe
xwênî şêx meḧmûde lew ser dare dezruqêtewe
min bełênit pê edem ewřo le dengî kurdewe
ew kuřey zincîrî yexsîrî le esto kirdewe
komełe pîşmergekey diłsozî tołestênî to
cêjne pîrozey le sengerda deken bo xwênî to
dił ke řoj û şew desûtê, agirî toy têberbuwe
boye pyawane legełta mercî xwênî bestuwe
basî xwênî pakî toye û şořşî řizgarîye
yan be serbestî jyan yan mirdinî yekcarîye
ger to ewřo nî le nêwmana kuřî diłsozî to
hełgirî ałay xebat û şořşî pîrozî to
qařemanî kurdî aza mawe kawey barzan
ew kuře kurdey binaẍey dujminî toy hełweşan
diłnya be cêjne pîrozey dway newrozî min
cêjnî azadî gele û serkewtinî pîrozî min