hewarî çoł

temêkî sûrî katî zerdepeř
ew deşteçołey girtote baweş
řêbwarêkî naw kizeba û zuqmim..
gwêm keyl buwe le givey bařeş
* * *
řojanêkî zû le dewrî dewar..
kwanû egřa.. agir berz û geş
ew deşte xoşey caran hewar bû..
piře le qîje û qajey qeleřeş
* * *
darî kenar řê.. dest û pence zerd..
leber ziryana.. bała řût û qût
çaweřêy tawebaran û řêjnen..
asman têr bigrî be eşkî yaqût
* * *
pêłwekanî min piřn le tike..
bo ser mezarî gełay hełwerîw
ke çaw egêřim.. her xiřkey řeşe û
xołemêşêkî xamoş û tezîw
* * *
řojanî dêrîn.. bîr naçêtewe..
diłim her egrî.. çoł nîye le ẍem
«ba» gełay dirext dirwêne eka û
guł sîs û jakaw.. lutke ser be tem
* * *
gułêkî kêwî.. řwa û hełwerî..
dewarî qerec.. le say nisara
poleçroy ser çiłî payîz bû..
sed pelî dabû be řûy behara
* * *
cige lexşey gełay dem «ba»y koç..
ne awazêk dê.. ne dengî segweř
gewałeyek dê le dem asowe..
bo gořkirdinî termî zerdepeř
* * *
le pişt řehêłey hewrî řojana..
firîştey dewar çawî çote xew
hobey şiřupiř le xwar małana..
şox bû be wêney befrî nîweşew
* * *
bexîlîm ebird be jînî qerec..
gerçî dewaryan diřaw.. we şiř bû
meşxełanî naw serma û sołe bûn..
qułayî gyanyan piř sikił û giř bû
* * *
bała berzêkî esmerî qerec..
take firîşte û şoxî dewar bû
bo ser xewêkî naw giřî memkî..
serî piř zuqmim.. piř le hawar bû
* * *
çend sewdaser bûm.. qet cêm nehêłn..
kiçe qerecê bê be hawserim
gwêdrêjêk û segêkim benê..
bergî qerecê bike meberim
* * *
ba daka nimey eşkî payîzîy..
ta çaw piřtîne.. ta eka heter
bo gořêk ne kes leserî egrî û
kesêkîş gułî nexsitote ser