seng hewaran
Li pirtûka:
Dîwanî Welî Dêwane
Berhema:
Welî Dêwane (1826-1881)
2 Xulek
1010 Dîtin
seng hewaran, seng hewaran
seng syařeng siftey hewaran
melûl matem pes mendey yaran
çun min ham şerîk derd û pejaran
to seng konî ye kam hewaren
ye pey kê řengit azyet baren
siftey sewday ’eşq kamîn newhałî
bêdeng be diřeng mat melalî
to ce dax kê sifte sozanî
pes mendey hewar kamîn hozanî
řas waçe hicran kêt ne dił daxen
ce hicran kê bergit qełaxen
seng wat syabext sitem kêş xem
«perwane»y peşêw dûr keftey pay «şem»
mer nimezanî lêławît lêłen
ne îca mesken guzergay xêłen
yûrit çeragay xêł cafanen
cay ’eyş û nişat ’enber nafanen
hewargey řewêł xêł muradyen
maway şewq û zewq zumre şadyen
min hewar şem şay perwananim
xan xałxasan syayananim
payîz koç xêł byan we daman
teşrîf baweran wey zêdu zaman
min siftey ew şewq şołey şem çarem
daxên ew nûr seḧer sitarem
êd ke watiş pêm seng hewaran
min ce ew beter lał bîm ce ziban
zanam siftey şewq ew şem řuxsaren
daxdar dax may dest ew yaren
minîç ce hicran şay şem řuxsaran
ba bîm we hamřeng seng hewaran
ten çun syaseng hewaranmen
padşay xemkêş xem daranmen