ḧacî bêzarim
bo mam muḧemmed
Li pirtûka:
Şî’rekanî Ḧîlmî Kakeyî
Berhema:
Ḧîlmî Kakeyî (1882-1966)
2 Xulek
436 Dîtin
ḧacî bêzarim ...
cey dunyay fanî xeylê bêzarim
gîr werdey gerdab nefis bedkarim
camey mecazî bîyen we zînharim
delîl ḧayrîn bisaznî karim
çemeřay îmdad dułduł swarim
’aciz û meḧzûn zelîl û zarim
hîç kesê nîyen bido dest barim
ẍusey ey cîhan řêznan demarim
pey řehnemûnî dił întîzarim
padşay sebeb saz bisaznî karim
çemeřay îmdad dułduł swarim
we dest namerd nekey şikarim
ce řay heqîqet têk ney efkarim
şadî we mîsqal xem we xerwarim
her wextê zanay ce toy mezarim
swar we hana bisaznî karim
muḧtac we îmdad dułduł swarim
muḧtac dunyay ey řa guzarim
mest řoy elest dîdey xumarim
xasîm nekerden bed bîyen karim
êsta peşîman xecałat barim
yaheq řast barî wezin eş’arim
sînem piř xezne gewher bo barim
ya rib ali’badErebî bişnew hawarim
we řagey ẍełet nekey îcbarim
’asî ’îsyan bar hem şermezarim
kota xizmetim nîyen kirdarim
extyar pîr temen derûn bîmarim
kelb astaney dułduł swarim
yaheq nîcame meder azarim
er azarim hen biker tîmarim
nî xwab ẍefłet biker bêdarim
gîr wirdey gerdab beḧir xunxarim
zat şay ’elî tonî mî’marim
abad bikere lahuren şarim
pey şay xurasan bende zewarim
weca mawerî şerit û îqrarim
şerbet şîrîn bî we jar marim
esîr wimeḧbûs qel’e û ḧesarim
wêney dar bîd daym bê barim
bê sebir û bê ḧîlim beden etwarim
bê yar bê yawer zułmatî narim
çe te’ney munkîr hîç nîyen ’arim
çun geday muflîs wêł nam şarim
çe ey byaban wêney xewarim
çemeřay newroz fesił beharim
dił piř ce weswas derûn ẍubarim
çenî fezanan weham cwarim
fîday xak û pay yar wefadarim
nabîna û ’elîl bê kesb û karim
çe nam yaristan bê î’tîbarim
ḧacî gyan aman lêt neyo qarim
we ’eqîdey xas bişnew giftarim
bêzar çe cîfe duşmin dînarim
xeylê qanî’im we řûy řozgarim
daym ce îsłaḧ yar û eẍyarim
ce aşûb be’îd qaym esrarim
muqabîl we řezim hezar hezarim
pey meydan darî ’eceb swarim