hamdeman aman
Li pirtûka:
Dîwanî Cefayî
Berhema:
Cefayî (1835-1890)
3 Xulek
551 Dîtin
hamdeman aman...
hamdeman ser wext merdenim aman
gyan şîrînim ber amaş teman
derk û hoş û gişt ḧewasim řiman
yeqîn ser delîl sifîd endaman
perwerdey herdew wefay bê saman
yanê diłber şay şîrîn kelaman
îradey sefer kerden ce laman
fełek! dey, demên dił mestî wesiłim
xelas ce azar zemaney fesiłim
xêłxaney xeman koçşan kerden
ser êłî şadî teşrîf awerden
hewargey derûn kerden we menził
awedanen pêş fezay saray dił
ḧîle sazî kerd pey sizay dûrîm
saz da esasey derdî mehcûrîm
wist ew toy derûn diłber heway seyr
tertîb da esbab řay sefer we xeyr
we daney şaney diłey ewgarim
dane dane kerd tuřřeş diłdarim
paça we qeyçî sirtîp perçem
bî welaney dił ’aşiqan sercem
wegerd siftey cestekey bed ḧał
mesqel da sefḧey ayîney cemał
we hûn derûn piř bełay xemîn
çi weş řengîn kerd des û pay şîrîn
’ekis ew namûs ḧenayî berden
we dînş diłan çend peşêw kerden
surmey tûr dił suftey say cemał
çun ne ’eyneyniş kêşa we kemał
xicił kerd dîdey sipî tetaran
bêzya nergis ewweł weharan
ta nefewq ser kiławçey zeř bêz
pêça nedewirş şedey surme řêz
poşa webałaş kałay fereng kar
xefet da we dił nazaran hezar
wêş řazanewe we xişił şîrîn
ḧesret da we cerg cewanan çîn
şîrîn sa sirûr bê ḧed nederûn
mayl bî we lay řîkab guł gûn
wesed nazewe şîrîn tedarek
tezîyn da we zîn řîkaw mwarek
bew nyazewe şay cîlwedaran
bêbak ce wey řoy giroy ewgaran
řahî bî welay me’way piř sefa
astiş we ca ad xestey piř cefa
diłe dey ewşon şox cîlweger
hîç meber cya ce ewc sefer
azîzim aman! řeḧmeket ce kon?
wêt mizanî dił zedey tîrî ton
řicam hen ce lay ahûy weş řeftar
ney sefer çun mał dił nedo azar
beł sa er fełek sakîn bî ce qîn
berşî ce sîneş gird ḧesûdî û kîn
perê dûbarey wesiłim nerdê şend
řîşekey dirext xemim ce bêx kend
sîne saf însaf dada we firset
pey teskînî dił min kerdit ’ewdet
neřay seferda we ca nemano
bitawo ’ewdet kero çenî to