kuştey kirîşmey řîşey ciger biř
name bo meftûn
Li pirtûka:
Dîwanî Cefayî
Berhema:
Cefayî (1835-1890)
1 Xulek
515 Dîtin
kuştey kirîşmey řîşey ciger biř
«meftûn» ẍemzey perdey derûn diř
er diron er řas ama negoşim
çêwê ẍem cem kerd peşêw kerd hoşim
maçan xeyałit wedił awerden
yanê hay heway řeftenit kerden!
mer teḧsîl ’îlim ’eşq ewgaran
kesb şerî’et şor zamdaran
nexdimet ustad dił ’ellamey ’eşq
netedrîs ’îlim ’eşqida sermeşq
ne ber pencerey ḧucrey zewq esas
muzeyyen we neqiş ’eşq û şor û řas
nimegno we des peşêw meḧzûn
to heway luwat berden ew derûn
ne burc şîrîn ḧucrey medrese
binîşe pey ders dił bê weswese
be wîfq ferman şay muşkîn ẍezał
wesed soz dił weş keyf û weş ḧał
her terz meyl ton nûr çemanim
sebûrî diłey piř ce xemanim
te’lîmit kerden ’îlim per xeyał
ta wext řutbey îcazey kemał
xeyał batił ne xatir ker fek
neqşiş we pencey îqamet ker ḧek