pêkdadanî xan miḧemed legeł leşkirî se’îd û mes’ûd
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
2 Xulek
306 Dîtin
şazade mes’ûd řû kerd ne meydan
watiş îbrahîm bê nam û nîşan
بەێû ne meydan neberd binmanîm
ḧeq şar demişq neto bistanîm
xan miḧemed watiş ḧemîd melaḧ
to canşîn ber be sulḧ û selaḧ
sipa muntezîr kê şo be meydan
naga mes’ûd şa ama bemeydan
xan miḧemed watiş mel’ûn gumra
kem biker bê ca şûm bê ḧeya
«bizirgiş nixiwanind z ahil xird
hir ke nam bizirgan bezşitî bird»
to çi ḧed darî şazadey salar
tełeb bikerî nerûy karzar
xan miḧemed êd dî leb da belebda
şimşêr ełmas hem daş be serda
mes’ûd ke qełẍan kêşa beserda
daş be ser qubey sedir esperda
şazade mes’ûd dest da ne şimşêr
nała û nirkina bewr deng dilêr
daş neferq ser sedir sehminak
xan tîẍ daş nera çun şêr bê bak
hem zerbey henî kerdiş nerûy kar
mes’ûd nerûy zîn kerdiş giriftar
leşkir êdiş dî hicûm awerdin
şazade mes’ûd we ber ber kerdin
hem dîsan ce new swar bî be esp
řû kerd nemeydan çun azerguşesp
neherdû teref bî be çekaçek
yek tebeq zemîn nîşt nerûy felek
gaga xan miḧemed řû be ẍułaman
mewat ẍułaman destim bedaman
hey aman yaran îmcar bigîren
ceng serumał miłk û esîren
êd wat û řûkerd ne sipay xûnxiwar
hêrş awerdin çil hezar swar
ewne şeř kirya neřûy karzar
serkefit nemeydan wêney gełay dar
aftab ẍirûb kerd asayş ji endin
her kes řû beray xeyme awerdin
xan miḧemed yawa benaw ẍułaman
yekser zexmidar mekerdin aman
ferman da derdem leşkir kerd şumar
şiş hezar ẍułam bibîn giriftar
şay noş aferîn girewa bezar
yeqey mirwarî diřî ta be war
mah zeř’efşan des kerd be girîn
xan miḧemed dîdeş piř bî ne esrîn