şazade hewałî çonyetîy şeř legeł kyanoş le xurşîdî ’ałem depirsê
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
3 Xulek
427 Dîtin
şazade ferma xurşîd salar
çenî xatûne be text bûn swar
wêş hem swar bî we ferheng dêw
kefit nerûy zemîn welweley ẍerîw
xatûne û xurşîd şîn nerûy ḧerem
nîştin nerûy text pîroz tarem
şazade çenî leşkir fereng
daxił bîn be şar besaz û aheng
wezîran temam sucdey şa berdin
şazade ferma dêw ḧazir kerdin
ferman da ferheng wezîran şar
biber be asman hewa der bewar
dêwan heryekê wezîrê berdin
nerûy hewada seringûn kerdin
ehil şar yekser feryad awerdin
tezeru’ belay şazade kerdin
şazade ceşar guzeşt kerdiş
ewsa ehil şar oqre awerdiş
şazade lwa nîşt we ban text
watiş ey ferheng bang kêşe besext
bwaçe herkes xyanet kero
’îbret ce wezîr fereng horgêro
ferheng dêw derlad cař kêşa be şar
ehil şar yekser kerdiş xeberdar
şazade derdem ferheng salar
nerûy text zeř kerdiş berqerar
wêş lwa be naw seraçey ḧerem
xatûn û xurşîd herdû dî be çem
herdû horêzan kerdişan pêşwaz
pêşwazî kerdin besed ’îz û naz
şazade derdem ’eleyk send benaz
nîştin ne řûy text her sê bedłiwaz
xeylê desbazî kerdin ne’ew ca
xatûne xanim horêza we pa
pyałey şerab awirdiş bewar
wêş bî we saqî xatûney nazdar
pyałey şerab kêşan we serda
dem dan we desmał ’etir ’enberda
xatûne watiş şazadey bêgerd
ewsa ke amam ’erz babom kerd
ta weqit ẍirûb meyom be duma
qesemim warden min we ferq şa
şazade derlad murexesiş kerd
horêza we pa řû ne êrem kerd
şazade çenî xurşîd be daxwaz
herdû şîn nexaw şîrîn bedłiwaz
sob seḧer herdû bêdar bîn nexaw
nîşte bîn ce řûy kursîy bo guław
şazade xurşîd nya we řûy text
wêş nepay text qerar girt we cext
buzirgan şar yekser awerdin
gişt nepay text hem ḧazir kerdin
şazade řûkerd wat bewezîran
temam ehil şar serḧesab keran
her kes neferman xurşîd şo we ber
maçûn we celad bikeroş bê ser
temam buzirgan gişt xel’et kerdiş
adab sełtenet berqerar kerdiş
welayet fereng seqam da lêşan
her kes ke lwan becagey wêşan
wêş çenî xurşîd lwan weḧerem
dan ce pyałe demadem dem dem
cedmay sê řoj şazadey bêgerd
ew celay xurşîd řuxset tełeb kerd
xurşîd ’ałem be diłey piř derd
şazadey serwer merexes bikerd
şazade nepuşt ferheng bî swar
řû kerd ne wiłat meẍrîbî dyar