geyştinî melîk behmen be şazade û hełgîrsanî şeřî şewane
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
2 Xulek
407 Dîtin
dîsan qasîdan awerdin xeber
şazade yawan beseḧray exzer
behmen çun şineft derdem bî swar
leşkir berd beser şazadey salar
bîn be çwar dese new zułmat û tar
girtin dewradewr şêr beçey zordar
qaw kefit ne quşûn şazadey salar
watin şazadey bê xeber nekar
qabiz ke aman pey gyanit beqes
nazo nehîç ca bikîşot nefes
şazade şineft ne xaw bî bêdar
derdem dersa’et be’esp bî swar
ẍuřa xan miḧemed ce řûy qîn û qar
zûd çenî ḧemîd be esp bûn swar
hey byawin û beyon be îmdad
bizanûm behmen çêşşen murad
* şazade řûkerd ne sipay xûnxiwar
řûkerd nefewc sed hezar hezar
watiş nabêkar ne řûy ’ersey dewr
meger nam min neşneftî newer
namim îbrahîm saḧêb qeranim
kuşendey cadûy ’ersey meydanim
ne cadû ne şêr ne bewr gumřa
hîç kam nebendim nimebon řeha
xan miḧemed çenî ḧemîd salar
yawan be şazade ne řûy karzar
şazade watiş ey şûm bedkar
kên çi karen ney zułmat tar
wat melîk behmen şêr piřişko
şay noş aferîn mesano ce to
bełke be zînde bişî beray wêt
şay noş aferîn sûd nedaro pêt
weger ne qesem bezat eła
nazûm be zînde to bişî bera
şazade watiş ey şûm le’în
kem biker bîca e to ey bê dîn
min telîsim sext cadûm şikestim
ta noş aferîn yawa bedestim
mer şar demişq neyadit şîyen
mer to nazanî şazade kîyen
we yadit meyo çêşim kerd ew şew
lêtan ḧeram bî hem xurd û hem xew
xan miḧemed çenî şay noş aferîn
heryek celayê hełmet dan be kîn
çend kes kuştişan new zułmat tar
hicûm awerdin leşkir sedhezar
girtin dewradewr şêran piřkîn
kerdin we cesteş çend zexim sengîn
yend zexmidar bî nerûy ’ersey kar
axir her çwar fêrar bîn fêrar
herçiwar bew destûr kerdişan tedbîr
bigurêzan ce naw ’ersey darugîr