řoyştinî noş aferîn bo ser serçawey noş û birdinî «’elqem»y dêw
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
2 Xulek
506 Dîtin
goş biden bekar çerx çepî waz
hengamey ’ezîm cenew mebo saz
goş biden beraz zemaney werîn
cenew bişnewîn ce noş aferîn
ferma çeşmey noş piř sefa kerdin
şay noş aferîn bew çeşme berdin
çenî kenîzan zułfan ’enberîn
řefêq muşfêq şay noş aferîn
lwan behemřaz be serçeşmey noş
be demaẍ dił mah qeseb poş
seday zîl û bem çeng çeqane
soz mehweşan şeyday zemane
besed nazewe mah qeseb poş
daxil bîn be naz beserçeşmey noş
yawa be çeşmey zułał bêgerd
îradey hewes ẍusił beden kerd
peřendey piř guł best nerûy kemer
daxił bî betab nazdar dułber
wêş da nerûy ab şay perî sîfet
menmana wêney bet nerûy şet
zencîre zułfan pexiş medaşewe
zînet da be tab çeşmey noşewe
peřçîn zułfan syay lûl beste
nedewr gonay guł besten deste
ne cergey perî ta ḧorî pêwe
kes nedîyen we çem meḧbûb wey şêwe
mekerd şistuşû bałay nazperwerd
çun ’ekis xurşîd ab çem mewerd
ab řêza we ban gonay gułnarî
pexiş bî wedoşda wêney mirwarî
ber’ama ne ab ce serçeşmey noş
noş meḧrûmîy wêş ama be coş
nîşt nerûy meřmeř wêney duřdane
beşane kerdiş zułfanş şane
be pencey nazk tuẍray xoş aheng
zułfan xaw mekerd be mewday çil ceng
şane da nezułf tu’zay syawe
pey şehryaran damş nyawe