şîrîn sehminak
Li pirtûka:
Dîwanî Xanay Qubadî
Berhema:
Xanayê Qubadî (1704-1778)
1 Xulek
875 Dîtin
şîrîn sehminak, şîrîn sehminak
řîşey mekir wêt, qubbey řoy eflak
gîsûş çun maran ketif şay zuḧak
ce duşmin neters, ce dostan bêbak
zułf wenoşey dêz, la’eyn bor çîn
sîwadî û ser xem, qetran řîşey dîn
ḧebeş ẍułaman, korpesay sawa
sen’an ne řaber pêşanî awa
şewqî pêşanî şay sin’et karen
sinûr mabeyn leyl û neharen
goş be goşwarey tełabêzewe
musułman we çîn zułf dêzewe
goşey ’eyn we xeşim, nîgay nazewe
meylşan we zehir bê’îcazewe
dehen we lûlûy ma’îl gencewe
leb be duřři’efşan gewhersencewe
sedir şî ne sîney sendûq barewe
xał çun guł wenewş çînî karewe
bał bahûbend, guł diriştewe
ḧena řeng besten da negşitewe
surme çem be nûr subḧan řiştewe
ḧûr’asa meyo ne beheştewe
xało we demaẍ ẍełtan paşî bî
xane we sergerd amaw lwaşî bî