walî weharen
Li pirtûka:
Dîwanî Mestûre
Berhema:
Mestûre (1804-1848)
2 Xulek
991 Dîtin
walî weharen ...
be tacit qesem, fesłî weharen
şikofey gułan ce dûr dyaren
îbtîday fezay guł û gułzaren
zumeřed řengen seḧra û keş û ko
be cext menałan ne hîcranî to
gułan û gułzar we hem cem besten
bułbuł ce badey wesłişan mesten
jerej mewano neser kiławan
medo cîlwey wêş ne pay wefrawan
bułbuł ne soziş bîyen neẍmexwan
hezar mewano be hezar destan
dirextan xełat exzerî poşan
diłey desaxan ce new mexroşan
dehen wa kerden şikofey dił çak
bergî tak poşan xełat we řûy xak
wenewşe û ře’na, guł mîna û sosen
xeymeşan pêkan zêba û yasemen
bidax û zemeq, nesrîn û řêḧan
guł surx û guł zerd çenî erẍewan
her yek be tewrê xudsazîşanen
emma peşêwî dûrîy toşanen
supay sîsenber xêzan ce baxan
guł mêxek kerden çemen çiraxan
lale û şeqayq sunbuł û şewbo
zar zar megrewan perêw ’eził to
nesteren ne baẍ, neylofeř ne aw
nergis ne çemen, semen ne şetaw
pey dûrît -qurban- serḧełqey yaran
her yo be new’ê matemê daran
nîmê gerdin keç, nîmê ser newer
nîmê cigerxûn, nîmê xak we ser
nîmê sûçyan sebûnî dûrî
nîmê wa berdey wagey mehcûrî
nîmê camey gyan wêşan kerden çak
nîmê dûr ce to, ser nîyan we xak
nîmê çenî ẍem ser nîyan we hem
nîmê pey amat, gertenî we dem
xulasey kelam: mayey nîşatim
řoḧ efzay řoḧim, mayey ḧeyatim
qesem bew lîqay yûsif asay to
hîç yek ney gułan nekerdenim bo
temaşay seḧra û gułanî weşbo
şerten ney wehar ce min ḧeram bo
seyrî gułałan ne pay kosaran
bê to -dûr ce to- sefa nedaran
řezay fidewît zwîr û zaren
perêw me’zûlît ce gyan bêzaren
gerdûnî çepgerd çe nerdê baza
esasey ’uzlet nîm sa’et saza
çêş mebo fełek nerdê bişano
derdekey ême bewan binmano?