mewlam derdişen
Li pirtûka:
Dîwanî Bêsaranî
Berhema:
Bêsaranî (1643-1702)
1 Xulek
737 Dîtin
mewlam derdişen ...
tafî dêweznaw, ’eceb derdişen
pirşing meşano řoy neberdişen
perê wesłî dost ahî serdişen
bebê dest û pa, safî bê ceste
ten parepare, derûn şikeste
ce tafî qełwez, wêş mewzo bewar
megno weřûy seng, qetrey xoşgewar
zarzar menało çûn zamet daran
cew pey řewanîş bebê mudaran
meşno we neẍmey sazî řezbarî
mewzo we kenar sipî mirwarî
cêş meyo seday dengî zemanî
mwaço ce fîraq, řazî nîhanî
daym ne seyren weqtî subiḧ û şam
řû we kesêşen, nedaro aram
sa meger weqtê bigêro qerar
ẍełtan bû fanî wasił nepay yar
hîcrî bê payan, midran be xidmet
mekero tesbîḧ qadrî qudret
’aşiqê çûn taf, zewq û şadîşen
me’şûq perê ew ya ’îbadîşen
mewlam her kesê ḧałî taf zano
dana bo, ’arf, hestîş nimano