risîdin xibir fut şidin bihram çubîn bih xisru
Li pirtûka:
Şîrîn û Xusrew
Berhema:
Xanayê Qubadî (1704-1778)
4 Xulek
461 Dîtin
mustewfîy dîwan defterxaney ’eşq
perê bizurgan bey tewr da sermeşq
řwê ke bilûr subiḧ sîmabî
bî be şułey xor xîtmî û ’ennabî
gerdûn şurû’ kerd be diłnewazî
horgêła dîsan ce neyrengisazî
zemane eymen ce ẍuẍa û feryad
serzemîn sakin ce zułim bêdad
be fał feřrux, be pîrayey new
xusrew cew demda wêney keyxusrew
yaqût qubbey xergaş çun xurşîd
midrexşa ne ferq bercîs û nahîd
ce pay pêşgay şahîş qedrê dûr
midrabê qeyser, şay hînd û feẍfûr
kîşwer xudayan gerdûn îqtîdar
her yek ne cayê girtebên qerar
xasey ẍułaman daney duř ne goş
giranbehay hînd, dêbay simor poş
qoçaxan bewr tac û kemer lał
çun encum ne dewr bedir may zułał
midrabên ne dewr ew şay derya kef
pey fermanberî û bendegî sef sef
kesê cew yaran be řo ta be şew
ce sam sengîy padşahîy ew
bê řuxset ḧerfê ne řûy encumen
nimawerd ne zebit sîlsîley suxen
nîştebê xusrew be demax berz
minoşa badey erẍewanî terz
zumrey ehil bezim çun neqiş dîwar
bê dawa û bê deng, xamoş ce guftar
naga cew demda perêy «fitiḧ albab»
peyda bî peykê nadîrey nayab
bosa pay serîr şay dara nigîn
wat to siłamet behram çobîn
be cay text ’ac ce şûmîy bextiş
textey çobîn bî îmşew be textiş
cey xeber xusrew şay kemer lałan
ẍerq bî ne gêcaw beḧir xeyałan
wat hey pîre çerx çewaşey çepgerd
kêt ne çay ełḧed sernîgûn nekerd
nimez be kêt da řutbey serwerî
ne yanet newest axir çemerî
bidye ey namerd merdum firêwen
xa’în bed tewr xanedan şêwen
minet miberdiş ne řûy serzemîn
be çobek zenî behram çobîn
demê bazûş kerd be dewłet qewî
nya ne ferqiş tac xusrewî
axir kerdiş ḧek namey ḧeyatiş
tac sełtenet wist be mîratiş
îse ew çobîn şêr efgen be naz
çopan asat kerd ne dinya perwaz
herkes famdaren ’eqił û fam pêşen
pêş nebo badî, wadey çerx çêşen?
er şan, er xundikar feřřux tebaren
caş her qebir teng zułmat taren
ta êse begram çobîn piř zat
wêney eskender ne řûy serbîsat
de’way tac û text cîhandarîş bî
temennay menseb şehryarîş bî
îse sayey seng ełḧed mawaşen
çenî kirim û mar ceng û dawaşen
kon ew berq têẍ supay bê řamş
milerza ne beḧir neheng ce samş
kon ew zat û zor tehemten tewirş
kon ew danay xas nadîrey dewirş
kesê newaço gerdûn namerd
herçenî behram bê moletîş kerd
deha çend hezar şahan cem text
keyxusrew sewîr, berarindey text
pest kerd ne zemîn berz payeşan
say seng ełḧed bî besayeşan
ce ’ersey ey dewr piř ce derdiser
nebî ce behram nimek şinaster
nîhayet be ḧerf be’zê napesend
tema’ kerd ne mułk êmey derdimend
nefamaş ẍułam çenî xwacey wêş
xeylê bedîwminen bibo bed’endêş
çun ce ḧedid wêş ew pa wiyara
sa bî samanş ce xak sara
însan ew xasen keç şu’ûr nebo
be zor bazûy wêş meẍrûr nebo
pa nenyo we ber ew ce ḧedid wîş
newa çun behram çobîn beyo pêş
herkes ce ẍurûr turk û tazî kerd
çenî bizurgan pencebazî kerd
be zor bazûy şêran cengî
be neyrûy neberd supay sam sengî
axir cun behram çobîn bedkêş
şikist faḧîş mwêno be wêş
herkes ce ezeł saḧêb kemałen
serçeşmey seraw zeyniş zułałen
er midan peneş şahîy eskender
pa ce ḧedid wêş nimenyo we ber