pasix dadin şîrîn xisru ra
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
526 Dîtin
tûtîy şekerřêz, řaz wêney şeker
bey tewr da cewab şay feřrux exter
wat hey keyxusrew keyan cem co
sed şîrîn çun min be sergerdit bo
be wêt mizanî bewr behmen sam
be kêş şahan cem qedir cem cam
munasb nyen her peristarê
bibo be hamřaz yek şehryarê
řasten ke zułfim bo ’ebîrînen
zeřrê ce lay to zeřem şîrînen
bełê min çendan ne řûy ’ersey dewr
qabîl nîm ke şay behmen terz û tewr
pey wicûd min ce zeřre kemter
bikêşo bey tewr ewend derdiser
min kêm ke çenî xusrewê çun to
bibûn be hamřaz be şew ta be řo
be gyanit qesem şay dara nigîn
her ta ke zîndem ne řûy serzemîn
min kemter kenîz peristar tom
min aftawedar, xizmetkar tom
min seqay medbex bo’ebîr tom
ce şam ya şîraz her esîr tom
min her cařûkêş kêşkixaney tom
min awpaş xak astaney tom
min kamim xusrew, wicûdim çîşen ?
pey çêş yend pey min xatirit řêşen?
qezat le gyanim şay dara efser
wesen, sa wes wêt bider derdiser
eger şa meyliş be şîrey qenden
řasten şîrey qend xatir pesenden
bełê be bê wext danay xîredmend
nuqsanen noşan şehd şîrey qend
er çendê henîç şay dara beydax
bikero sebrê nebo bê demax
ce şîrey qendim her şew ta be řo
binoşo şerbet noş gyanş bo
werne be bê wext şay zînet ara
şîrînî bey tewr nyen guwara
beła mikerûm îstîd’a îmşew
biderom mołet şehenşa îmşew
meyl kero be cam cur’ey mey îmşew
buyero be lutif ce teqsîr îmşew
meyl kero be cam cur’ey mey îmşew
goş dero be nexiş saz ney îmşew
nekêşo sewday weswasem îmşew
kem taqet nebo ce tasem îmşew
şîrîn ce xusrew be zar milała
xusrew pey şîrîn çen ne minała
kafir migrewa bew řestaxêze
bew daway şîrîn, lałay perwêze
menzûr şîrîn şazadey perî
êd bî cey gişt pas, cey gişt dawerî
ḧîfiz daney lał ce ełmas mikerd
’erz wêş ce fî’il qebîḧ pas mikerd
pey çêş? ke banûy berarindey text
dabêş cey werter sed sewgend sext
mebada xusrew siften ce daxiş
teseřřuf kero guł baẍçey baxiş
me’lûm bo ce lay yek řengan ’eşq
aşfitey hîcran qeys meynet meşq
herçend be zwan ew şem’ piř nûr
cewab xusrew mida bey destûr
bełê derûnş migřya be taw
mamaş we çemda esrîn çun sêław
bey tewr ke midîş şa be bê demax
peyapey peywest her mikêşa ax
herçend ew ahûy zułf û xał mîşkîn
must ne ebroş be ẍezeb sed çîn
ce lałay xusrew derdiş bî karî
mwara be çem esir mirwarî
be dem bey destûr be lence û lare
cwab xusrew mida bey tare
emma ce sewday ew daray lał poş
pûk wêş migirt, cergiş mida coş
girîşmeş ce ḧerf şa ḧaşa mikerd
nîm nîgaş be naz temaşa mikerd
her lêş be duzdî ẍemzey ẍezeb coş
mida delalet îşarey ebroş
axir ke berşî ew bûm peřey guł
be emir xusrew, emma nek be dił
xusrew sa ke dîş ḧuqqey bazîy ew
hîç nyen ne řay çaresazîy ew
kêşaş ne derûn bew tewr ah serd
herwext bî gerdûn bikero be gerd